काठमाडौं । कोरोना भाइरसको संक्रमणबाट जोगिन सरकारले गरेको लक डाउनपछि रोकिएका नेपाली कामदारहरुलाई कोरिया पठाइने भएको छ । मन्त्रिपरिषदको आइतबार बसेको बैठकले दुई देशबीचको सहमतिमा इपीएस मार्फत छनोट भएका कामदारलाई कोरियामा पठाउने निर्णय गरेको सरकारका प्रवक्ता डा.युवराज खतिवडाले जानकारी दिए ।
पछिल्लो समय कोरियामा जान भाषा पास गरेर भिषा समेत आइसकेका धेरै युवाहरु अलपत्रमा परेका छन् । भिषा आएर पनि धेरै कामदार जान नपाएपछि उनीहरुको भिषा नै स्थगित हुने अवस्था आएको भन्दै दुई देशको सहमतिमा कामदारलाई कोरिया जान दिने निर्णय भएको खतिवडाले जानकारी दिए ।
कोरियामा कोरोना संक्रमण फैलिएपछि सरकारले जोखिम हुने भन्दै कामदार पठाउन रोकेपछि कोरियाले पत्र नै लेखेर आपत्ति जनाएको थियो ।
सन २०२० का लागि कोरिया भाषा परीक्षा पास भएका १२ हजार कामदार अझै जाने क्रम सुरु भएको छैन । कोरोनाको महामारी अघिसम्म २०१८ र १९ का लागि पास भएकाहरु गइरहेका थिए । लकडाउनका कारण २०२० को लागि भाषा परीक्षा पास गरेकाहरुले अहिले ‘लेबर कन्ट्रयाक्ट आइरहे पनि उनीहरु जानसक्ने अवस्था थिएन । अब त्यो बाटो फुकेको छ ।
