अमेरिकी राष्ट्रपति डोनाल्ड ट्रम्पले आगामी सातादेखि राष्ट्रपतिको दोस्रो कार्यकालका लागि औपचारिक रुपमा प्रचारप्रसार शुरु गर्ने बताउनुभएको छ ।
अर्को हप्ता ओक्लोहामा राज्यको टुल्सामा चूनावी सभाको आयोजना गरी प्रचार शुरु गर्ने उहाँले बताउनुभएको छ । ह्वाइट हाउसमा सञ्चारकर्मीहरुसंग उहाँले फ्लोरिडा, टेक्सस र अरिजोना राज्यमा पनि प्रचारका लागि भ्रमण गर्ने जानकारी दिनुभयो ।
राष्ट्रपति ट्रम्पका चुनावी सभाहरु व्यापक र विशाल प्रकृतिका हुने तथा तिनीहरु विपक्षी पार्टी डेमोक्र्याटका उम्मेदवार जो बाइडेनले सोचेभन्दा भिन्न हुने उहाँको सचिवालयले जनाएको छ ।
पछिल्ला चुनावी मतसर्वेक्षणमा राष्ट्रपति ट्रम्पभन्दा विपक्षी डेमोक्र्याट पार्टीका उम्मेदवार जो बाइडेन अगाडि देखिनु भएको छ । कोभिड–१९ महामारी र एक अश्वेतको मृत्यु भएपछि अमेरिकाभर फैलिएको हिंसात्मक झडपका कारण राष्ट्रपतिका चुनावी कार्यक्रमहरु केही महिनादेखि स्थगित छन् ।।
