१४ पुस,काठमाडौं। दक्षिण एशियाली फुटबल महासङ्घ (साफ) को फुटबल प्रतियोगिता आगामी वर्ष बङ्गलादेशमा हुने भएको छ ।
सोमबार भएको कार्यकारी समितिको भर्चुअल बैठकले साफ च्याम्पियनसीप फुटबल प्रतियोगिता नेपाली समय अनुसार आगामी वर्ष २०७८ कात्तिक २८ देखि मङ्सिर ११ गतेसम्म गर्ने निर्णय गरेको हो ।
यो वर्ष गर्ने भनिएको फुटबल प्रतियोगिता कोरोना भाइरसको महामारीका कारण आगामी वर्षलाई नयाँ मिति सार्वजनिक गरिएको हो । बैठकले साफको उमेर समूहका विभिन्न प्रतियोगिताको समेत समय तय गरेको छ ।
महिला यू–१६ साफ प्रतियोगिता सन् २०२१ को अगष्ट १८ देखि २७ सम्म आयोजना गर्ने तथा साफ यू–१९ प्रतियोगिता जुलाई १२ देखि २२ सम्म सञ्चालन गर्ने बैठकले निर्णय गरेको छ ।
यस्तै पुरुषतर्फ साफ यू–१५ प्रतियोगिता अक्टोबर १ देखि १० सम्म तथा साफ यू–१८ प्रतियोगिता अक्टोबर १५ देखि २४ सम्म सञ्चालन गर्ने निर्णय गरिएको छ ।
