२२ पुस काठमाडौं। एक जना पूर्वबैंकर र पार्टी अधिकारीलाई चीनले मृत्युदण्डको फैसला सुनाएको छ । भ्रष्टाचार गरेको, सरकारी पैसा हिनामिना गरेको र बहुविवाहको गरी तीन आरोप खेपिरहेका सिआओमिनलाई तिआन्जिन अदालतले मृत्युदण्डको फैसला सुनाएको हो।
सिआओमिन यसअघि राज्यनियन्त्रित चाइना होआरोङ एसेट म्यानेजमेन्टका अध्यक्ष थिए । उनले १० वर्षमा झन्डै १.७९ अर्ब युआन घुसबापत् लिएको बताइएको छ। अदालतले सिआओमिनले धेरै रकम घुस लिन आफ्नो पदको दुरूपयोग गरेको निष्कर्ष निकालेको छ। उनले मानिसहरूलाई जागिर दिन, बढुवा गर्न र ठेक्का पार्न पनि घुस लिने गरेका थिए।
उनी विवाहोत्तर सम्बन्धमा पनि दोषी पाइएका छन्। उनले पत्नीबाहेक अर्की महिलासँग सम्बन्ध बनाएको र उनीबाट सन्तान पनि जन्माएको उल्लेख गरिएको छ।
सिआओमिनले राज्य कोषबाट २ करोड ५० लाख युआन हिनामिना गरेको अदालतले बताएको छ।
सिआओमिनलाई सन् २०१८ को अप्रिलदेखि अनुसन्धान थालिएको थियो। त्यही बेला उनलाई चिनियाँ कम्युनिष्ट पार्टीबाट पनि निष्कासित गरिएको थियो।
