२७ फागुन, काठमाडौं । ब्राजिलमा कोरोना भाइरसको महामारी फेरि गम्भीर बन्दै गएको छ । महामारी सुरु भएयता पहिलोपटक ब्राजिलमा एकै दिन दुई हजार भन्दा धेरैको कोरोना कारण ज्यान गएको छ।
ब्राजिलमा बुधबार एकै दिन कोभिड–१९ का कारण २२ सय ८६ जनाको ज्यान गएको छ । विश्वमै धेरै व्यक्तिको ज्यान जाने देशको सूचिमा दोस्रो स्थानमा रहेको ब्राजिलमा अहिलेसम्म दुई लाख ६८ हजार तीन सय भन्दा धेरैको ज्यान गएको छ ।
अति संक्रामक नयाँ भेरियन्टका कारण संक्रमणदर तीव्र हुँदा अवस्था थप भयावह भएको हो ।
महामारी नियन्त्रणका लागि गरेको प्रयास अति कमजोर भएको भन्दै राष्ट्रपति जायर बोल्सोनारोको तीव्र आलोचना हुँदै आएको छ ।
बुधबार पूर्वराष्ट्रपति लुइज इनासिओ लुला डा सिल्भाले महामारीका बेला बोल्सोनारोले ‘स्टुपिड’ निर्णय लिएको बताए ।
ब्राजिलमा अहिलेसम्म एक करोड १२ लाख दुई हजार भन्दा धेरै संक्रमित भएका छन् ।
