तन्त्र

एउटा थाल
दुई खाने मुख
तानातान , भनाभन
आइपरे हानाहान
एक्लै खाने , सुँघ्न नै  नदिने
खोसेरै लिने , मैले पनि किन नखाने
छिनाझापट
यसलाई नै भनिँदो रहेछ
प्रतिगमन-अग्रगमन
अग्रगमन-प्रतिगमन
स्वाद लिईरहेकालाई अग्रगमन
थुक निलीरहेकालाई प्रतिगमन

आफ्नोमात्र कुरा छ
जनता नाथेको के कुरा
जनता जनार्दन को पो जय हुनु पर्ने
जनता कता, जनार्दन कता

भान्छे बन्न पठाएका
थाल खोसाखोसमा

झुमी रहेकाछन च्याँखे दाउमा बिचौलिया

थप्पडी बजिरहेछ
बुझेर कि बुझ पचाएर
ठेलमठेल
लेख र दन्त बझान

हजुर कुन छेउमा उभिरहनु भएको छ
कुन गमनको प्रबक्ता
को आए , को भए , को गए हजुरले मर्जी भएको हुन्छ
दाउ कुन खालमा

कसैलाई सत्तामा  उकाल्न
कसैलाई सत्ताबाट ओराल्न
बाह्रमासै ब्यस्त तन्त्रलाई
बहूरुपी सडक नाटकलाइ
म के तन्त्र भनुँ
हसुरतन्त्र
असुरतन्त्र

अझै तपाईंलाइ टाउको दुखेको छैन !
आरामै हुनुहुन्छ ?

-0-

कपिल अधिकारी
ताइपे , ताइवान ।