भारत,३ बैशाख
गएराति सम्पन्न आईपीएल २०२१ को सातौं खेलमा राजस्थान रोयल्सले दिल्ली क्यापिटल्समाथि ३ विकेटको जित निकाल्दै अंक तालिकामा आफ्नो खाता खोल्न सफल भएको छ ।
टस हारेर ब्याटिङको निम्तो पाएको दिल्ली २० ओभरमा ८ विकेट गुमाउँदै १४७ रनमा समेटिएको थियो । दिल्लीको सुरुवाती ब्याटिङ खासै राम्रो हुन नसकेपनि कप्तान रिषभ पन्तले अर्ध-शतकीय कप्तानी पारी खेल्दै १४७ रनको साधारण योगफल बनाएका थिए ।
१४८ रनको लक्ष्य बोकेर ब्याटिङमा उत्रिएको राजस्थानले १९ दशमलव ४ ओभरमा आफ्नो सात विकेट गुमाउँदै १५० रन बनाएपछि यो जित राजस्थानको हातमा गएको हो ।
राजस्थानका लागि जयदेव उनादकातले आफ्नो चार ओभरमा १५ रन खर्चिएर ३ विकेट लिंदै ११ रनको पारी खेलेवापत प्लेयर अफ द म्याच घोषित भए ।
राजस्थानले दिल्लीलाई पछिल्लो ६ खेलमा पहिलोपटक हराउन सफल भएको हो ।
आज साँझ चेन्नई सुपरकिङ्स र पञ्जाव किङ्सबीच प्रतिस्पर्धा हुँदैछ ।
