१९ बैशाख, रुपन्देही । लुम्बिनी प्रदेशका मुख्यमन्त्रीबाट राजिनामा दिनुभएका शंकर पोखरेललाई आजै मुख्यमन्त्रीको सपथ ग्रहण गराउने तयारी भएको छ।
प्रदेश प्रमुखले आजै नयाँ सरकार गठनको आह्वान गर्ने र एमालेले बहुमत प्राप्त दलको हैसियतमा नाम पठाएपछि पोखरेलले मुख्यमन्त्री पदको सपथ ग्रहण गर्ने तयारी भइरहेको एक नेताले बताउनुभयो।
आजै बसेको लुम्बिनी प्रदेशसभाको एमाले संसदीय दलको बैठकले मुख्यमन्त्रीमा पोखरेललाई नै प्रस्ताव गरिसकेको छ ।
आफूविरुद्धको अविश्वास प्रस्तावमा मतदान हुनुअघि नै पोखरेलले मुख्यमन्त्री पदबाट राजीनामा दिएपछि उहाँको राजीनामा प्रदेश प्रमुख धर्मनाथ यादवले तत्कालै स्वीकृत गर्नुभएको छ ।
एमालेले लुम्बिनीमा एकल बहुमतको सरकार गठनमा दाबी गरेको छ । आफू संविधानको धारा १६८ को उपधारा २ अनुसार मुख्यमन्त्री बनेको र अब १६८ को १ अनुसार एकल सरकार गठन गर्ने भन्दै पोखरेल त्यसको तयारीमा जुट्नुभएको छ।