काठमाडौं ,१८ जेठ
निषेधाज्ञाकै बीचमा सरकारले पाँचवटा एयरलाइन्सलाई सातामा १० वटा अन्तर्राष्ट्रिय उडान गर्ने गरी अनुमति पाएको छ ।
नेपाल नागरिक उड्डयन प्राधिकरणले शनिबार र आइतबारबाहेक सातामा ५ दिन आउने र जाने गरी दुईटा अन्तर्राष्ट्रिय उडानका लागि अनुमति दिएको हो । प्राधिकरणले मंगलबार सूचना जारी गर्दै ५ वटा वायुसेवा कम्पनीलाई सातामा १० वटा नियमित उडान खुला गरेको हो ।
टर्कीको स्तानबुलका लागि टर्किस एयरलायन्स, कतारको दोहाका लागि नेपाल वायुसेवा निगम तथा कतार एयरवेज र भारतको नयाँ दिल्लीका लागि एयर इन्डिया र नेपाल वायुसेवा निगमले नियमित उडान गर्न अनुमति पाएका हुन् ।
तालिका अनुसार अब हरेक बिहीबार युरोप र अमेरिकाका यात्रुले टर्किस एयरलायन्सको उडानबाट ओहोरदोहार गर्न सक्ने भएका छन् । दिल्ली–काठमाडौं उडानलाई बुधबार र शुक्रबार निरन्तरता दिइएको छ ।
दोहा हुँदै मध्यपूर्वी मुलुकलगायत अन्य मुलुकहरुमा जानका लागि सोमबार बिहान कतारले र राति नेपाल वायुसेवा निगमले काठमाडौंबाट उडान भर्नेछन् । नेपालबाट सोमबार राति दोहा जाने निगमको विमान मंगलबार काठमाडौं फर्किने भएको छ ।
अहिलेलाई ती ५ वटा वायुसेवा कम्पनीलाई सातामा १० वटा नियमित उडान जेठ १८ देखि असार १६ सम्म खुला गरिएको छ ।
