एजेन्सी
पाकिस्तानविरुद्ध ३ खेलको एक दिवसीय सिरिज अन्तर्गत दोस्रो खेलमा घरेलु टोली इङ्ल्यान्ड विजयी भएको छ । उसले शनिबार भएको खेलमा ५२ रनको जित हात पारेको हो ।
जितसँगै इङ्ल्यान्डले १ खेल अगावै सिरिजमाथि कब्जा जमाएको छ ।
इङ्ल्यान्डले दिएको २४८ रनको लक्ष्य पछ्याउनले क्रममा पाकिस्तानले सबै विकेट गुमाउँदै ४१ ओभरमा १९५ रन मात्र बनाउन सक्यो ।
उसका लागि साउद शकिलले अर्धशतकीय पारी खेले पनि त्यो जितका लागि पर्याप्त बन्न सकेन । ७७ बलको सामना गरेका उनले ४ चौकाको मद्दतमा ५६ रन प्रहार गरे ।
हसन अलीले ३१, सादब खानले २१ को योगदान दिँदा अविजित रहेका शहिन अफ्रिदीले १८ रन जोडे ।
इङ्ल्यान्डका लागि लेविस ग्रेगोरीले ३, साकिब महम्मद, क्रेग ओभर्टन र म्याट पार्किनसनले समान २-२ विकेट हात पार्दा ब्रेडोन कार्सेले १ विकेट हात पारे ।
यसअघि लन्डनमा टस हारेर ब्याटिङको निम्तो पाएको इङ्ल्यान्डले ४५.२ ओभरमा सबै विकेट गुमाउँदै २४७ रनको योगफल तयार पारेको थियो ।
इङ्ल्यान्डका लागि फिल साल्ट र जेम्स भिन्सले अर्धशतकीय पारी खेले । ६० रनमा अविजित रहेका साल्टले ५४ बलमा १० चौका प्रहार गरे ।
५२ बलको सामना गरेका भिन्सले ८ चौकाको मद्दतले ५६ रन जोडे । लेविस ग्रेगोरीले ४० र ब्रेडोन कार्सेले ३१ रनको योगदान दिए ।
पाकिस्तानका लागि हसन अलीले ५, हारिस राउफले २ विकेट लिँदा सादब खान, साउद शकिल र शहिन अफ्रिदीले समान १-१ विकेट हात पारे ।
जितसँगै इङ्ल्यान्डले सिरिजमा २-० को अग्रता बनाएको छ । तेस्रो तथा अन्तिम खेल मंगलबार बर्मिङ्घममा हुनेछ ।