२८ असार, काठमाडौं । बागमती प्रदेशसभाको बैठक अर्को सूचना जारी नभएसम्मका लागि स्थगित भएको छ । प्रदेशसभाका सभामुख सानुकुमार श्रेष्ठले प्रदेशसभाको अर्को बैठक अनिश्चितकालसम्मका लागि स्थगित भएको जानकारी दिनुभयो ।

प्रदेशसभाको सोमबार बिहान बसेको पहिलो बैठकले प्रदेश सरकारको आर्थिक विधेयक पारित गरेको थियो । उक्त विधेयक पारित भएपछि १० मिनेट स्थगित गरी पुनः सञ्चालन भएको प्रदेशसभाको दोस्रो बैठकले प्रदेश पर्यटन विकास सम्बन्धमा व्यवस्था गर्न बनेको विधेयक र प्रदेश उच्च शिक्षा सम्बन्धमा व्यवस्था गर्न बनेको विधेयकलाई दफावार छलफलका लागि सम्बन्धित समितिमा पठाएको छ ।

त्यसपछि अर्को सूचना जारी नभएसम्मका लागि बैठक स्थगित गरिएको हो ।