टोकियो
अन्तत: आज शुक्रवारदेखि टोकियो ओलम्पिक खेल-२०२० प्रारम्भ भएको छ ।
ओलम्पिकको औपचारिक थालनीका लागि आज शुक्रवार साँझ ओपनिङ सेरोमोनी आयोजना हुँदैछ, जसलाई कोरोना महामारीका कारण निकै नै सामान्य तरिकाले सम्पन्न गरिंदैछ ।
नेपालको तर्फबाट यो ओलम्पिकमा चार खेलका पाँच खेलाडीले प्रतिस्पर्धा गर्दैछन् ।
विश्व खेलकूदको महाकुम्भ ओलम्पिकमा नेपाललले एथ्लेटिक्स, सुटिङ, जुडो र पाौडी खेलमा सहभागिता जनाउँदैछ ।
ओलम्पिकमा एथ्लेटिक्समा सरस्वती चौधरी, सुटिङमा कल्पना परियार, जुडोमा सोनिया भट्ट तथा पौडीमा गौरिका सिंह र एलेक्स शाहले नेपालको चुनौती प्रस्तुत गर्नेछन् ।
नेपाली समय अनुसार आज साँझ पौने पाँच बजे ओपनिङ सेरोमोनीमा जापानका सम्राट नारुहितो पनि सहभागि हुने कार्यक्रम छ ।
वास्तवमा टोकियो ओलम्पिक खेल २०२० मै हुनु पर्ने थियो, तर कोरोना महामारीका कारण यसलाई एक वर्ष स्थगित गर्नु परेको थियो ।
ओलम्पिक खेलको इतिहासमै यो पहिलो पटक भएको हो ।
टोकियो ओलम्पिकमा २ सय ५ देशका ११ हजार खेलाडीहरुले भाग लिँदैछन् ।
उनीहरु सबै टोकियो पुगिसकेका छन् ।
१७ दिनसम्म चल्ने यो खेलको महाकुम्भमा ३३ भिन्दा–भिन्दै खेलहरुका ३ सय ३९ वटा इभेन्टहरु हुनेछन् ।
यसपटक ओलम्पिकमा मेडिसन साइक्लिङ, बेसबल र सफ्टबलको पुनरागमन भएको छ ।
यसका साथै थ्रि बाई थ्रि बास्केटबल तथा फ्रीस्टाइल बिएमएक्सलाई पनि समावेश गरिएको छ ।
यसपटकको ओलम्पिकमा पनि विगतको झैं अमेरिका, बेलायत, चीन, रुस, जापान तथा जर्मनीबीच मेडल ट्यालीमा उत्कृष्ट हुँदै शीर्ष स्थानमा रहनका लागि कडा टक्कर हुने निश्चित छ ।
कोरोनाको संकटका बीच ओलम्पिक खेल आयोजना गरेर जापान आफ्नै जनताको निशानामा परेको छ ।
जापानमै विभिन्न स्थानमा यो खेलका विरुद्ध प्रदर्शन समेत भैरहेका छन् ।
यद्यपि, त्यहाँ खेल कमिटि र सरकारले कोरोनाको संक्रमणलाई फैलिन नदिनका लागि सम्पूर्ण कोशिस गरेका छन् ।
अन्तर्राष्ट्रिय ओलम्पिक कमिटिका अध्यक्ष थोमस ब्याचका अनुसार ओलम्पिक गेम सुपर स्प्रेडर समारोह सावित नहुने बताएका छन् ।
यसका बावजूद गत जुलाई १ देखि हालसम्म नै ओलम्पिक खेलसंग सम्बन्धित ६७ जना कोरोना पोजिटिभ भैसकेका छन् ।