काठमाडौं ,३०असोज
माल्दिभ्समा जारी साफ च्याम्पियनसिप फुटबलको फाइनल आज (शनिबार) हुँदैछ ।
मालेस्थित राष्ट्रिय रंगशालामा हुने फाइनलमा उपाधिका लागि नेपाल र भारतबीच प्रतिस्पर्धा हुँदैछ । नेपाल र भारतबीचको खेल नेपाली समय अनुसार राति ८ः४५ बजे सुरु हुनेछ ।
दुबै टिमको प्रमुख लक्ष्य उपाधि जित्ने रहेको छ । पाँच राष्ट्र सहभागी राउण्ड रोबिन लिगको आधारमा भएको प्रतियोगिताको शीर्ष स्थानमा रहेर भारतले फाइनल खेल्न लागेको हो भने नेपालले दोस्रो स्थानमा रहेर फाइनल खेलेको हो ।
साफ इतिहासमा पहिलो पटक फाइनल पुगेको नेपाल आज भारतलाई हराएर ऐतिहासिक उपाधि जित्न चाहन्छ ।
यता साफमा भारत सबैभन्दा सफल टिम रहेको छ । भारतले ७ पटक उपाधि आफ्नो नाममा गराइसकेको छ ।
लिग चरणमा नेपाल र भारतबीच प्रतिस्पर्धा भएको थियो । जहाँ भारतले नेपाललाई १-० गोलले पराजित गरेको थियो ।
हेड टु हेडको कुरा गर्दा भारत नेपालविरुद्ध पुर्णरुपमा हाबी छ ।
यी दुई टिमबीच २२ पटक खेल भएको छ । जसमा भारतले १५ खेल जित्दा नेपालले दुई खेल जितेको छ भने ५ खेल बराबरीमा सकिएको छ ।
यता भारतविरुद्ध नेपालका फरवार्ड अन्जन विष्टले यसअघिका खेलहरुमा दुई पहेलो कार्ड खाएको कारण फाइनल खेल गुमाउने छन् ।