२ कात्तिक, चितवन। नेपालको तेस्रो गन्तव्यको प्रमुख क्षेत्र चितवनमा पर्यटकहरुको चहलपहल वृद्धि हुँदै गएको छ । कोरोना भाइरसका कारण थलिएको पर्यटन व्यवसाय कोरोना संक्रमणदर घट्दै गएसँगै पर्यटकहरुको चहलपहल बढेको हो ।
कोरोना भाइरस घट्दै जानु र चाडवाडका कारण पनि चितवनको सौरहामा पर्यटकहरु वृद्धि भएको व्यवसायीहरुले बताएका छन् ।
नेपालीहरुको महान चाड बडादशैंका बेला सौरहाका ७० देखी ८० प्रतिशत होटलहरु भरिएको क्षेत्रिय होटल संघ सौरहाका अध्यक्ष दिपक भट्टराईले बताउनुभयो ।
लामो समयसम्म बन्द रहेका होटलहरु अहिले सबैजसो संचालनमा आएका छन् । सौरहामा पर्यटक वृद्धि भएपछि होटल रेष्टुरेण्टहरु चल्नुका साथै हात्ती सफारी जीप सफारी जाने पर्यटकहरुको पनि घुँईचो लाग्ने गरेको छ ।
सौरहामा हाल करीब २ सयको हाराहारीमा पर्यटकहरु हात्ती सफारीमा जाने गरेका छन् । चितवनमा हाल अमेरीका, ब्रिटेन, चीन, भारतलगायतका देशबाट समेत पर्यटकहरु आउन थालेको व्यवसायीहरुको भनाइ छ ।
कोरोना भाइरसले नराम्रोसँग थला परेको पर्यटन व्यवसायमा चितवनमा देखिएको पर्यटकको चहलपहलले केही आशा पलाएको छ ।
