१६ कात्तिक, काठमाडौं । प्रदेश १मा मन्त्री बन्ने ५ जनाको नाम फाइनल भएको छ। मंगलबार मुख्यमन्त्रीमा नियुक्त हुनुभएको राजेन्द्र राईले ५ मन्त्रीको नाम फाइनल गर्नुभएको हो। सोमबार प्रदेश १ का मुख्यमन्त्री भीम आचार्यले पदबाट राजीनामा दिएपछि एकीकृत समाजवादीका नेता राईको नेतृत्वमा नयाँ सरकार गठन भएको हो ।
गठबन्धन दलबीच भएको सहमति अनुसार जनता समाजवादी पार्टीका नेता जयराम यादवलाई सामाजिक विकास मन्त्रालयको जिम्मेवारी दिइने भएको छ । यस्तै, नेपाली काँग्रेसका प्रमुख सचेतक केदार कार्कीलाई आन्तरिक मामिला तथा कानुन मन्त्रालय र उपनेता हिमाल कार्कीलाई भौतिक पूर्वाधार विकास मन्त्रीको जिम्मेवारीसहितको मन्त्रालय दिने भएको छ ।
त्यस्तै नेकपा माओवादी केन्द्रका नेता इन्द्रबहादुर आङ्बोले आर्थिक मामिला मन्त्रालय र संयुक्त लोकतान्त्रिक राष्ट्रिय मञ्चकी सांसद विष्णुमाया तुम्बाहाङ्फेले सामाजिक विकास राज्यमन्त्रीको जिम्मेवारी सम्हाल्ने टुङ्गो लागेको छ ।
