१६ मङ्सिर, कर्णाली । कर्णाली प्रदेशसभाको नवौं अधिवेशन बैठक अन्त्य भएको छ। मुख्यमन्त्री जीवनबहादुर शाहीका लागि विश्वासको मत लिन बोलाइएको प्रदेश सभा बैठक २ दिन बसेर अन्त्य भएको हो।

कर्णाली प्रदेश सरकारको सिफारिसमा प्रदेश प्रमुख तिलक परियारले बुधबार राति १२ बजेबाट बैठक अन्त्य भएको घोषणा गर्नुभएको छ।

प्रदेश प्रमुखको कार्यालयद्धारा जारी विज्ञप्तिमा भनिएको छ,‘ नेपालको संविधानको धारा १८३ को उपधारा (२) बमोजिम बुधबार राति १२ बजेबाट कर्णाली प्रदेश सभाको नवौं अधिवेशनको अन्त्य गरिएको व्यहोरा जानकारी गराइन्छ ।’

मुख्यमन्त्री शाहीले विश्वासको मत लिन बोलाइएको उक्त प्रदेशसभाको बैठकमा प्रमुख प्रतिपक्ष दल नेकपा एमाले भने उपस्थित भएको थिएन।