कीर्तिपुर ,१६ मङ्सिर
प्रदेश १ माथि १ विकेटको रोमाञ्चक जित निकाल्दै गण्डकी प्रदेशले राजधानीमा जारी वाई–वाई यु–१० क्रिेकट प्रतियोगितामा फाइनल प्रवेशका लागि सम्भावना कायमै राखेको छ ।
कीर्तिपुर स्थित त्रिभुवन विश्व विद्यालयको मैदानमा आज भएको खेलमा गण्डकीले प्रदेशलाई १ विकेटले हराउँदै लिग चरणको अन्तिम खेलमा सुखद नतिजा निकाल्दा फाइनल प्रवेश सम्भावनालाई जिवन्त राखेको हो । जित निकाले पनि फाइनल प्रवेशका लागि भोली हुने सुदुर पश्चिम र बागमती प्रदेशबीचको खेल पश्चात मात्र टुङ्गो लाग्ने छ ।
प्रदेश १ ले दिएको १ सय ३४ रनको लक्ष्य पछ्याउने क्रममा गण्डकीले ३८ ओभरमा ९ विकेट गुमाएर पुरा गरेको हो । गण्डकीको जितमा अर्जुन कुमालले सर्वाधिक ३५ रनको पारी खेल्दा दिपक डुम्रे ३३ रनमा पवेलियन फर्किएका थिए । मिलन क्षेत्रीले २४ रनको योगदान गर्दा किरण पौडेल १२ रनमा अविजित रहे ।
गण्डकीको ९ विकेट निकाल्ने क्रममा प्रदेश १ का दिपेश कँडेलले सर्वाधिक ४ विकेट निकाले । लुभ कमाटले ३ विकेट आफ्नो नाममा लेखाए । ६ मध्ये ३ खेलमा सुखद नतिजा निकालेको गण्डकी तालिकाको तेस्रो स्थानमा उक्लिएको छ । यता ५ मध्ये ३ खेल जितेको सुदुरपश्चिम प्रदेशले ६ अंक जोडेपनि नेट रनरेटका आधारमा दोस्रो स्थानमा रहेको छ ।
यस अघि टस जितेर पहिले ब्याटिङ गर्ने निर्णय गरेको प्रदेश १ ले ४४.४ ओभरमा सबै विकेट गुमाउँदै १ सय ३३ रन जोडेको थियो । प्रदेश १ का लागि दिपेश कँडेलले सर्वाधिक ४६ रन जोड्दा दीपक जोशीले १६ तथा विवेक आनन्द मेहताले १४ रनको योगदान गरे । अन्य खेलाडीले दोहोरो अंक जोड्न सकेनन् । गण्डकीका लागि कमल परियारले सर्वाधिक ३ विकेट हात पारे । सुदिप अर्यालले २ तथा किरण पौडेल, सुवास भण्डारी र विष्णु पाण्डेले एक–एक विकेट लिए ।
प्रतियोगिता अन्तर्गत आजै भएको अर्को खेलमा कर्णाली प्रदेशले प्रदेश नम्बर २ माथि दुई विकेटको संघर्षपूर्ण जित निकाल्यो । मुलपानी क्रिकेट मैदानमा ४६ रनको लक्ष्य पुरा गर्न कर्णालीले ८ विकेट गुमाउनु परेको थियो । कर्णालीले १३ दशमलब ३ ओभरमा लक्ष्य पुरा गरेको थियो । कर्णालीविरुद्ध पराजित भएसँगै प्रदेश २ प्रतियोगिताबाट बाहिरिएको छ ।
