काठमाडौँ, ७ पुस । नेपाली काँग्रेसका सांसद राजेन्द्र बजगाईँले विपद्मा परेका गोरखा क्षेत्र नं १ का जनतालाई आफ्नो तलबभत्ता सहयोग गर्ने बताउनुभएको छ ।
मङ्सिर ४ गते सम्पन्न प्रतिनिधीसभा र प्रदेशसभा निर्वाचनमा गोरखा क्षेत्र नं १ बाट निर्वाचित सांसद बजगाईँले आज संसद भवन नयाँ बानेश्वरमा सांसदको सपथ लिएसँगै आफ्नो पारिश्रमिक विपद्मा परेका गोरखा क्षेत्र नं १ का जनताका लागि खर्च गर्ने बताउनुभएको हो ।
“आज मैले सांसदको शपथ लिइरहँदा गोरखा– १ को भूगोल सम्झियाँ, त्यहाँका जनताका दुःख सम्झियाँ, त्यसैले सांसदका लागि आउने पारिश्रमिक मैले गोरखा १ मा विपदमा परेकालाई सहयोग गर्ने प्रतिबद्धता जनाएको छु,”– सांसद बजगाईँले भन्नुभयो ।
गोरखाको क्षेत्र नं १ का अधिकाशं भू–भागमा अहिलेपनि मोटरवाटो पुग्न सकेको छैन । उहाँले गत हप्ता गोरखा क्षेत्र नं १ का ५६ वडामा विरामी बोक्नका लागि एक÷एक वटा स्टेचर सहयोग गर्नुभएको थियो ।