काठमाडौं, । नेपाली कांग्रेसले उपनिर्वाचनको लागि पार्टीको उम्मेदवार टुङ्ग्याउन सकेको छैन । आगामी बैशाख १५ गते ईलाम क्षेत्र नं २ र बझाङ क्षेत्र नं १ प्रदेश ‘क’ मा हुन लागेको उपनिर्वाचनमा पार्टीको तर्फबाट उठाउने उम्मेदवारको बारेमा छलफल गर्न आज बैठक बसेपनि उम्मेदवार चयन गर्न नसकेको हो ।
पार्टीका सूचना, सञ्चार तथा प्रचार विभागका प्रमुख मीनबहादुर विश्वकर्माले उपनिर्वाचनका लागि पार्टीको संसदीय वोर्ड र केन्द्रीय कार्यसम्पादन समितिको बैठक बसेपनि उम्मेदवार टुङ्गो लगाउन नसकिएको जानकारी दिनुभयो ।
“आज उम्मेदवारको विषयमा गहन छलफल भयो, उपनिर्वाचनका लागि पार्टीबाट सिफारिस भएका केन्द्रमा आएका आकांक्षीबीच भोलि छलफल गरेर उम्मेदवार टुङ्गो लगाउने कुरा भएको छ,”– विश्वकर्माले भन्नुभयो ।
उम्मेदवार टुङ्गो लगाउन भोलि दिउँसो २ बजे पुनः केन्द्रीय कार्यसम्पादन समितिको बैठक बस्ने निर्णय भएको विश्वकर्माले बताउनुभयो । उपनिर्वाचनमा पार्टीको तर्फबाट उठाउने उम्मेद्वारको बारेमा छलफल गर्न सोमबार साँझ पनि कांग्रेसका पदाधिकारी, पूर्व पदाधिकारी एवम् शीर्ष नेताहरुको छलफल भएको थियो ।
वैशाख १५ गते हुने उपनिर्वाचनका लागि निर्वाचन आयोगले चैत २४ गते उमेद्वारको मनोनयनपत्र दर्ताको समय तोकेको छ । नेपाल कम्युनिष्ट पार्टी (एमाले), राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टी (राप्रपा)लगायतले पार्टीको उम्मेदवार तोकिसकेका छन् ।
