रौतहट- गौरमा अनिश्चितकालीन निषेधाज्ञा (कर्फ्यू) घोषणा गरेर सुरक्षा तीन वटै सुरक्षा बल परिचालन गर्दा पनि गौरका भित्री भागमा आगजनी र तोडफोड हुनेक्रम नरोकिएको स्थानीय प्रशासनले जनाएको छ ।
परिस्थिति असामान्य बनेपछि स्थानीय प्रशासनले कर्फ्यू लगाएर नेपाली सेनासमेत परिचालन गरेको थियो ।
उत्तेजक भिडले गौर नगरपालिका–४ मचकुटिया टोलमा एउटा स्कुटरमा आगजनी गरेका छन् । प्रदर्शनकारीले हालसम्म छ वटा मोटरसाइकल र दुई वटा जिपमा आगो लगाइदिएका छन् । सेना परिचालनपछि गौरको मुख्य सडक शान्त देखिए पनि भित्री भागहरूको अवस्था अझै तनावग्रस्त रहेको स्थानीयको भनाई छ ।
गौर नगरपालिका–६ स्थित सनगढा गाउँमा दुई समुदायबीच भएको झडपले उग्र रूप लिएपछि तनाव सुरु भएको हो ।
विवादले गौरको वडा नम्बर ४, ५ र ६ मा झडप समेत भएको थियो । स्थिति नियन्त्रणमा लिन प्रहरीले हवाई फायर र अश्रुग्यासका सेलहरू प्रहार गरेको थियो । केही व्यक्ति सामान्य घाइतेसमेत भएको प्रहरीले जनाएको छ ।
थप हिंसा फैलनेसक्ने देखेपछि जिल्ला प्रशासनले कर्फ्यू आदेश जारी गरेको थियो । शनिबार दिउँसो १ बजेबाट कर्फ्यू आदेश लागु भएको छ ।
प्रशासनको सूचना अनुसार, पूर्वतर्फ मुडबलवा गेट, पश्चिमतर्फ लालबकैया बाँध, उत्तरतर्फ बम नहर, दक्षिणतर्फ गौर भन्सार कार्यालयमा कर्फ्यू जारी गरिएको छ।
