काठमाडौँ –  प्रधानमन्त्री वालेन्द्र शाहका राजनीतिक सल्लाहकार असिम शाहको संयोजकत्वमा गठन गरिएको ‘संविधान संशोधन बहसपत्र तयार गर्ने कार्यदल–२०८२’ को दोस्रो बैठक आज दिउँसो ३ बजे बस्दैछ ।

प्रधानमन्त्री तथा मन्त्रिपरिषद्को कार्यालय सिंहदरबारमा बस्ने बैठकमा राजनीतिक दलहरूबाट प्राप्त लिखित धारणा तथा सुझावका आधारमा पहिचान गरिएका संविधान संशोधनसम्बन्धी मुख्य मुद्दाहरूमा छलफल गरिनेछ ।

बैठकमा कार्यदलको आगामी कार्ययोजना, कार्यविधि र बहसपत्र तयार गर्ने प्रक्रियालाई व्यवस्थित गर्ने विषयमा पनि विस्तृत छलफल हुने बताइएको छ । संविधान संशोधनसम्बन्धी बहसलाई संस्थागत र समावेशी बनाउन विभिन्न राजनीतिक दलहरूको धारणा समेट्ने उद्देश्यसहित कार्यदल अघि बढाइएको जनाइएको छ ।