काठमाडौं – बागमती प्रदेशका मुख्यमन्त्री इन्द्रबहादुर बानियाँको घर तथा विभिन्न कार्यालयहरूमा सम्पत्ति शुद्धीकरण अनुसन्धान विभागले छापा मारेको छ। विभागले सोमबार काठमाडौं र हेटौंडास्थित उनका आवास तथा कार्यालयहरूमा एकैसाथ छापा मारेको जनाएको छ।
विभागका अनुसार बानियाँमाथि अवैध रूपमा सम्पत्ति आर्जन गरेको तथा विवरण लुकाएको आशंकामा अनुसन्धान सुरु गरिएको हो। सोही सन्दर्भमा काठमाडौंको नक्साल र सुन्धारास्थित कार्यालयका साथै हेटौंडामा रहेको घर र कार्यालयमा टोली परिचालन गरी कागजात तथा प्रमाण संकलन गरिएको बताइएको छ।
बानियाँ ‘क’ वर्गका ठेकेदारसमेत रहेकाले उनको आर्थिक गतिविधिमाथि विशेष निगरानी राखिएको स्रोतले जनाएको छ। विभागले छापामार कारबाहीमार्फत आर्थिक कारोबारसम्बन्धी विवरण, कागजात र अन्य प्रमाणहरू जफत गरी थप अनुसन्धान अघि बढाएको छ।
नेपाली कांग्रेस बागमती प्रदेश सभापति समेत रहेका बानियाँ २०८२ साउन २० गते बागमती प्रदेशको मुख्यमन्त्रीमा नियुक्त भएका थिए। उनी हाल प्रदेश सभामा संसदीय दलका नेतासमेत छन् ।
