काठमाडौं- विशेष अदालतले सम्पत्ति शुद्धीकरणसम्बन्धी मुद्दामा आरोपित व्यवसायी दिपक भट्ट र सुलभ अग्रवाललाई थप १२ दिन थुनामा राखेर अनुसन्धान गर्न अनुमति दिएको छ।
बुधबार सदस्य न्यायाधीशहरू हेमन्त रावल, डिल्लरत्न श्रेष्ठ र विदुंर कोइरालाको इजलासले उक्त आदेश दिएको हो।
सम्पत्ति शुद्धीकरण अनुसन्धान विभागले मिति २०८३ वैशाख २३ गतेको पत्रमार्फत आरोपितहरूलाई थप म्याद आवश्यक रहेको भन्दै अदालतसमक्ष निवेदन दिएको थियो। विभागका अनुसार हाल ऐन संशोधनपछि सरकारी वकिल तोक्ने, राय प्रतिवेदन तयार गरी पठाउने तथा अभियोजनसम्बन्धी प्रक्रिया अझै बाँकी रहेको छ। साथै, सम्बन्धित कसूरतर्फ केन्द्रीय अनुसन्धान ब्युरो (सीआईबी) बाट पनि अनुसन्धान जारी रहेको जनाइएको छ।
अदालतले पेश भएको मिसिल तथा कागजात अध्ययन गर्दा सम्पत्ति शुद्धीकरण (मनी लाउन्डरिङ) निवारण ऐन, २०६४ अनुसार संयुक्त अनुसन्धान टोली गठन भई अनुसन्धान अघि बढिरहेको, साथै हालै अध्यादेशमार्फत ऐनका केही व्यवस्थामा संशोधन भई अभियोजन निकाय र अदालतको क्षेत्राधिकारसमेत परिवर्तन भएको अवस्थालाई ध्यान दिएको जनाएको छ।
उक्त आधारमा अदालतले दिपक भट्टको हकमा पाँचौँ पटक र सुलभ अग्रवालको हकमा छैटौँ पटक म्याद थप गर्दै २०८३ वैशाख २३ गतेदेखि लागू हुने गरी १२ दिनको म्याद थप गर्ने आदेश दिएको हो।
यसअघि पनि दुवै आरोपितलाई पटक–पटक म्याद थप गर्दै अनुसन्धान अघि बढाइएको थियो।
