काठमाडौं – नेपाली कांग्रेसका महामन्त्री गगन थापाले राष्ट्रिय स्वतन्त्र पार्टी (रास्वपा) का कार्यकर्तालाई पार्टीभित्र प्रश्न गर्ने संस्कृतिलाई बलियो बनाउन आग्रह गरेका छन्।
रास्वपाको प्रथम महाधिवेशन उद्घाटन समारोहलाई सम्बोधन गर्दै थापाले कुनै पनि राजनीतिक दलमा नेताहरूलाई आलोचनाभन्दा माथि राख्ने प्रवृत्ति घातक हुने बताए। उनले आफ्नै पार्टीको अनुभव सुनाउँदै नेताहरूलाई ‘भगवान्’ वा ‘बा’का रूपमा प्रस्तुत गर्दा संगठनभित्र स्वस्थ बहस र आत्मसमीक्षाको वातावरण कमजोर हुने उल्लेख गरे।
थापाले कांग्रेसले विगतमा नेतृत्वप्रति आवश्यक प्रश्न उठाउन नसक्दा त्यसको राजनीतिक मूल्य चुकाउनुपरेको भन्दै रास्वपाका नेता–कार्यकर्तालाई त्यही गल्ती नदोहोर्याउन सुझाव दिए। उनका अनुसार पार्टीलाई सुदृढ बनाउन आफ्ना नेताको कमजोरी र गल्तीप्रति पनि खुलेर प्रश्न गर्न सक्ने साहस आवश्यक हुन्छ।
उनले अन्य दलका कमीकमजोरी औँल्याउनु मात्र पर्याप्त नहुने भन्दै आफ्नै पार्टीभित्र देखिएका त्रुटिबारे पनि स्पष्ट रूपमा बोल्न सक्ने संस्कृतिको विकास गर्नुपर्ने बताए। थापाले लोकतान्त्रिक अभ्यासको आधार नै आलोचना, आत्मआलोचना र जवाफदेहितामा रहेको उल्लेख गर्दै रास्वपाले सुरुदेखि नै त्यसलाई संस्थागत गर्नुपर्ने धारणा राखे।
