चितवन – राष्ट्रिय स्वतन्त्र पार्टी (रास्वपा) को बन्दसत्र आज नहुने भएको छ।
प्रतिनिधिहरूको अन्तिम नामावलीलगायतको तयारी नपुगेपछि आज हुने भनिएको बन्द सत्र स्थगित गरिएको हो ।
महाधिवेशन प्रतिनिधिहरुको नामावली रुजु गर्ने र प्रतिनिधि परिचयपत्र प्रिन्ट गर्ने कामले समय लिएकाले आज हुने भनिएको बन्दसत्र स्थगित गरिएको रास्वपाका प्रवक्ता मनिष झाले जानकारी दिनुभयो ।
रुजु गरिएका प्रतिनिधिको कार्ड प्रिन्ट गरी आज साँझदेखि वितरण सुरु गरिने र भोलि विहान ७ बजेसम्म सवै प्रतिनिधिको कार्ड वितरण गरी त्यसपछि बन्दसत्र सुरु गरिने प्रवक्ता झाले बताउनु भयो ।
झाका अनुसार प्रतिनिधिहरुको नामावली आज साँझ प्रकाशित गर्ने कार्यक्रम रहेको छ ।
यस्तो छ नयाँ तालिका–
बन्दसत्र उद्योग सङ्घको प्रदर्शनी केन्द्रमा हुँदैछ । बुर्लाकोटीका अनुसार बन्दसत्रको शुरूमा मंगलबार बिहान ७ बजे अनुशासन आयोगबाट रमाकान्त रिमालले अनुशासन आयोगको प्रतिवेदन प्रस्तुत गर्नेछन् । त्यसमा छलफल हुनेछ । सो पश्चात कोषाध्यक्ष लिमा अधिकारीको आर्थिक प्रतिवेदन प्रस्तुति र छलफल हुनेछ ।
कोषाध्यक्षको प्रतिवेदनपछि बुर्लाकोटीले सङ्गठनात्मक प्रतिवेदन प्रस्तुत गर्नेछन् भने त्यसमाथि छलफल पनि हुनेछ । सो पश्चात पार्टीका सहमहामन्त्रीले विधानमाथिको छलफल र त्यसलाई अनुमोदन गराइने छ ।
विधान अनुमोदनपछि पार्टी सभापति रवि लामिछानेले राजनीतिक प्रतिवेदन पेस गर्नेछन् भने उक्त प्रतिवेदनमा छलफल र अनुमोदन गरिने छ ।
पार्टी सभापति लामिछानेले अन्तरिम व्यवस्थापन समिति गठन घोषणा एवं आयोजक समितिले सम्पूर्ण जिम्मेवारी निर्वाचन आयोगलाई दिने तालिका छ ।
