काठमाडौं – अमेरिकाले यसै साता इरानसँगको युद्धविराम अन्त्य भएको एकतर्फी घोषणा गरेर इरानमाथि हमला सुरु गरेको छ । अमेरिकाले हिजोदेखि इरानमा तेस्रो चरणको शक्तिशाली बमबारी थालेको छ । गएरातिदेखि इरानमाथि अमेरिकी हमला निरन्तर रहेको छ ।
अमेरिकी आक्रमणपछि उता इरानले पनि स्टेट अफ हर्मुज बन्द गरिदिएको छ । इरानले घोषित रुपमै यो नाका बन्द गरेपछि यसबाट थप समस्या सिर्जना भएको छ । तेलको मुख्य नाकाका रुपमा रहेको यो बन्द भएपछि अब पुनः इन्धन आपूर्तिमा आन्योल हुने भएको हो ।
उता अमेरिकाले इरानमा हमला गरेपछि जवाफमा इरानले जोर्डन र खाडी मुलुकहरूमा मिसाइल तथा ड्रोन आक्रमण थालेको बताइएको छ । इरानले बहराइन, कुवेत, जोर्डन, कतार र ओमानमाथि आक्रमण गरेको दाबी गरेको छ भने संयुक्त अरब इमिरेट्स (यूएई) ले आफ्नो आकाशमा इरानी मिसाइल र ड्रोनहरू रोकेको जनाएको छ ।
हर्मुज जलडमरूमध्येको स्टेट अफ हर्मुज साइप्रसको झण्डा अंकित एक मालबाहक जहाजमाथि इरानले आक्रमण गरेको आरोप लगाउँदै अमेरिकाले यो सैन्य कारबाही गरेको हो ।
यसैबीच, इरानको बन्दर अब्बास, सिरिक, चाबहार, जस्क र असालुये जस्ता प्रमुख बन्दरगाह सहरहरूमा ठूला विस्फोटका आवाजहरू सुनिएका छन् । इरानी विद्रोही सेनाले हर्मुज जलडमरूमध्ये मार्ग अस्थायी रूपमा बन्द घोषणा गर्दै अनधिकृत मार्गबाट हिँड्ने जहाजमाथि चेतावनी स्वरूप गोली प्रहार गरिएको बताएको छ ।
अमेरिकी र इजरायली आक्रमणमा मारिएका पूर्व सर्वोच्च नेता अली खामेनीको मृत्युको बदला लिने प्रतिज्ञा उनका छोरा तथा वर्तमान सर्वोच्च नेता आयातोल्लाह मोज्ताबा खामेनीले गरेका छन् । उनले भनेका छन् “बदला नै हाम्रो राष्ट्रको इच्छा हो ।”
केही समयअघि मात्र दुई देशबीच युद्धविराम भएको थियो र दुई देशबीच सम्झौता हुन लागेको बताइएको थियो । तर, त्यो कार्यान्वयनमा नआउँदै अमेरिकाले एकतर्फी आक्रमण थालेको इरानको दाबी छ ।
उता अमेरिकी राष्ट्रपति डोनाल्ड ट्रम्पले भने इरानले आफ्नो हत्याको योजना बनाएको बताएका छन् । उनले यदि इरानले आफ्नो हत्याका लागि योजना बनाएको हो भने अमेरिकाले इरानलाई ध्वस्त गरिदिने चेतावनी पनि दिएका छन् ।
पछिल्लो समय यी दुवै देश निकै आक्रमक हुँदै आएका छन् । दुवै देशले आफू पछि नहट्ने चेतावनी दिइरहँदा विश्व शान्ति भने झन् गम्भीर अवस्थामा परेको विश्लेषकहरु ब्ताउन थालेका छन् । यो एक अर्काबीचको आक्रमणको सिलसिलाले अवस्था कहाँ पुग्ने हो भन्ने निश्चत नरहेको उनीहरुको दाबी छ ।
