काठमाडौं – बालिका गरिमा चौधरीको बलात्कारपछि हत्या प्रकरणमा संलग्न किशोरको बयानको भिडियो खिचेर सार्वजनिक गरेको आरोपमा एक प्रहरी पक्राउ परेका छन् ।
किशोरको बयान चलिरहेका बेला बयान कक्षभित्र खिचिएको भिडियो सामाजिक सञ्जालमा सार्वजनिक भएपछि प्रहरीमाथि प्रश्न उठेको थियो । भिडियोमा किशोरले घटनाबारे दिएको बयानसम्बन्धी संवेदनशील विवरणसमेत सार्वजनिक भएको थियो ।
भिडियो प्रहरीकै बयान कक्षबाट बाहिरिएको देखिएपछि अनुसन्धान अघि बढाइएको प्रहरीले जनाएको छ । अनुसन्धानका क्रममा भिडियो खिच्ने प्रहरीलाई पक्राउ गरी हिरासतमा राखिएको बारा प्रहरीका एसपी नरेन्द्र कुँवरले जानकारी दिए ।
उनका अनुसार पक्राउ परेका प्रहरीमाथि फौजदारी कसुरअन्तर्गत कारबाही अघि बढाउने तयारी भइरहेको छ ।
बयानको भिडियो खिच्ने समूहमा पाँच जना प्रहरी देखिएको र घटनामा अन्य प्रहरीको संलग्नता भए–नभएको विषयमा समेत अनुसन्धान भइरहेको प्रहरीले जनाएको छ । भिडियो कसरी खिचियो र सामाजिक सञ्जालमा कसरी पुग्यो भन्नेबारे प्रहरीले अनुसन्धान गरिरहेको छ ।
