काठमाडौं– रसुवाको उत्तरी सीमापारि चीनको तिब्बत क्षेत्रमा बनेको ठूलो ताल फुटेको सूचना प्राप्त भएको छ। ताल फुटेको जानकारी चिनियाँ पक्षबाट प्राप्त भएको रसुवाका प्रमुख जिल्ला अधिकारी नरेन्द्र परियारले जानकारी दिएका छन्।
उनका अनुसार छोचेन खोला र पुरेपू त्साङ्पो नदीको संगम आसपास बनेको नयाँ ताल फुटेको हो। उक्त क्षेत्र रसुवागढीबाट करिब १८ किलोमिटर माथि पर्छ।
‘२० मिनेटअघि मात्रै चिनियाँ पक्षबाट ताल फुटेको म्यासेज आएको छ,’ उनले भने।
यसैबीच नेपाल प्रहरीले पनि तिब्बततर्फबाट पानीको ड्याम पुनः फुटेको जानकारी प्राप्त भएको जनाएको छ। प्रहरीले उद्धार तथा राहत कार्यमा खटिएका सुरक्षाकर्मी, उद्धारकर्मी तथा सर्वसाधारणलाई तत्काल सतर्क रहन र सुरक्षित स्थानतर्फ जान आग्रह गरेको छ।
भदौ १० गते रसुवाको भोटेकोसी क्षेत्रमा आएको भीषण बाढीले ठूलो जनधनको क्षति पुर्याइरहेको अवस्थामा चीनतर्फ पुनः ताल फुटेको सूचना आएपछि जोखिम थप बढेको छ।
नेपाल प्रहरीले सम्भावित जोखिमलाई मध्यनजर गर्दै प्रभावित तथा तल्लो तटीय क्षेत्रमा रहेका सबैलाई उच्च सतर्कता अपनाउन र सुरक्षित स्थानमा जान अनुरोध गरेको छ।
