काठमाडौं – रसुवाको सीमावर्ती क्षेत्र टिमुरे हुँदै भोटेकोशी नदीमा बुधबार बिहान एक्कासि ठूलो बाढी प्रवेश गरेपछि नदी तटीय क्षेत्रमा त्रास बढेको छ।
बाढी भोटेकोशी हुँदै त्रिशूली नदीमा समेत प्रभाव पारेपछि आसपासका जिल्लाका नदी किनारमा उच्च सतर्कता अपनाउन आग्रह गरिएको छ।
जल तथा मौसम विज्ञान विभागका अनुसार बिहान करिब ९ बजेतिर तिब्बततर्फबाट ठूलो मात्रामा पानी नेपाल प्रवेश गरेको हो। बाढी वर्षाका कारण सामान्य रूपमा आएको नभई आकस्मिक रूपमा नदीको बहाव बढेको देखिएकाले तिब्बततर्फ हिमताल विस्फोट भएको हुनसक्ने प्रारम्भिक आशंका गरिएको छ।
बाढी पूर्वानुमान शाखाका प्रमुख विनोद पराजुलीका अनुसार घटनाको वास्तविक कारण पत्ता लगाउन चिनियाँ अधिकारीहरूसँग समन्वय भइरहेको छ। साथै उपग्रहबाट प्राप्त तस्बिर तथा अन्य प्राविधिक माध्यमबाट हिमताल विस्फोट भए–नभएकोबारे अध्ययन भइरहेको विभागले जनाएको छ।
अचानक आएको बाढीका कारण रसुवाको टिमुरे, स्याफ्रुबेँसीलगायतका क्षेत्रमा भौतिक संरचनामा क्षति पुगेको प्रारम्भिक विवरण सार्वजनिक भएका छन्।
बाढीको प्रभाव त्रिशूली नदीमा समेत देखिएपछि रसुवा, नुवाकोट, धादिङ र चितवनका नदी तटीय क्षेत्रमा उच्च सतर्कता अपनाउन आग्रह गरिएको छ। विशेषगरी नदी किनारका बस्ती तथा जोखिमयुक्त क्षेत्रमा रहेका नागरिकलाई सुरक्षित स्थानतर्फ जान भनिएको छ।
विभागले बाढीको अवस्था थप विकसित हुनसक्ने भएकाले आधिकारिक सूचना र सुरक्षा निकायको निर्देशन पालना गर्न तथा नदी आसपास अनावश्यक आवतजावत नगर्न आग्रह गरेको छ।
