काठमाडौं । मंसिर ४ गते सम्पन्न निर्वाचनका लागि चार जना महिला उम्मेदवार उठाएको नेपाली कांग्रेसबाट प्रतिनिधिसभामा एक जनामात्रै महिला उम्मेदवार विजयी भएका छन् ।
कांग्रेसले नेतृह पुष्पा भुसाल, महालक्ष्मी उपाध्याय ‘डिना’, सुजाता कोइराला, र सीता गुरुङलाई प्रत्यक्षतर्फ चुनाव लड्ने मौका दिएको थियो । तर, चार भुसाल, डिना र कोइराला तीन जना पराजित भए भने गुरुङ तेह्रथुमबाट प्रतिनिधिसभामा निर्वाचित भइन् ।
४५ वर्षीया गुरुङले निकटतम प्रतिस्पर्धी नेकपा एमालेका विजय सुब्बालाई १ हजार ७९ मतले पछाडि पार्दै विजयी भएकी हुन् । निर्वाचित भएसँगै उनी प्रतिनिधिसभाको प्रत्यक्षतर्फ चुनाव जित्ने कांग्रेसकी एक्ली महिला भएकी छन् ।
सत्ता गठबन्धनबाट साझा उम्मेदवार बनेकी कांग्रेसकी गुरुङले १९ हजार ७ सय २ भोट पाएकी छन् । एमालेका सुब्बाले १८ हजार ६ सय २३ मत पाए । सुब्बा ०४८ र ०५६ मा प्रत्यक्ष निर्वाचित र ०७४ का समानुपातिक सांसद हुन् ।
०६४ र ०७० को संविधानसभामा समानुपातिक सांसद बनेकी गुरुङ भौतिक पूर्वाधार तथा यातायात राज्यमन्त्री भइसकेकी छन् ।
उनी ०७४ को आम निर्वाचनमा हालका स्वास्थ्यमन्त्री भवानीप्रसाद खापुङसँग २ हजार २१ मतले पराजित भएकी थिइन् ।
कांग्रेस केन्द्रीय सदस्य रहेकी गुरुङ प्रधानमन्त्री तथा पार्टी सभापति शेरबहादुर देउवानिकट हुन् । आठराई क्षेत्रको इवामा जन्मिएकी गुरुङ ०४६ मा कांग्रेसको राजनीतिमा जोडिएकी हुन् । उनी ०६० मा नेपाल महिला संघको केन्द्रीय सचिव र ०६७ मा कांग्रेस केन्द्रीय सदस्य निर्वाचित भएकी थिइन् ।
०७२ र ०७८ मा सम्पन्न कांग्रेसको केन्द्रीय महाधिवेशनमा केन्द्रीय सदस्य निर्वाचित भएकी उनले राजनीति शास्त्रमा स्नातकोत्तर गरेकी छन् । तेह्रथुममा २०१५ देखि नै लिम्बू समुदायका उम्मेदवारले मात्रै केन्द्रको संसदीय चुनाव जित्दै आएका थिए । उक्त परम्परालाई गुरुङले यसपटक तोडेकी छन् ।
