रसुवा – आगामी फागुन २१ गते हुने प्रतिनिधिसभा सदस्यको निर्वाचन मिति नजिकिएसँगै राजनीतिक दलले उम्मेदवारसहित घरदैलो अभियान तीव्र पारेका छन् । फागुन ४ गतेअघि आमसभा तथा खुला कार्यक्रम गर्न नपाउने भएपछि उम्मेदवार मतदाताको घरदैलो कार्यक्रममा छन् । माघ ६ गते उम्मेदवारी दर्ता गरेपछि मतदाता समक्ष पुगेर भोट माग्न उम्मेदवार व्यस्त देखिन्छन् ।
एक मात्र निर्वाचन क्षेत्र रहेको रसुवामा यसपालि १२ जना चुनावी मैदानमा छन् । काँग्रेसका उम्मेदवार मोहन आचार्य अहिले घरदैलो अभियानमा व्यस्त छन्।
आइतबार पार्वती कुण्डबाट प्रचार अभियान सुरु गरेका आचार्य अहिले जिल्ला विभिन्न स्थानमा पुगी भोट माग्न व्यस्त देखिन्छन्।
रसुवा काँग्रेसले अहिले निर्वाचन परिचालन समितिमा बनाएर काम थालेको छ । पटक संसदीय निर्वाचन जितिसकेका मोहन आचार्य नै यस पटक पनि प्रतिस्पर्धामा छन्।
विसं २०७९ को चुनावमा झैँ यस पटक पनि पुरानै राजनीतिक दलबिच प्रतिस्पर्धा हुने देखिएको छ ।अघिल्लो निर्वाचनमा नेपाली काँग्रेसका केन्द्रीय सदस्य मोहन आचार्य निर्वाचित भएका थिए ।
नेपाली काँग्रेसको तर्फबाट मोहन आचार्यले तेस्रो पटक प्रतिनिधिसभा सदस्यका लागि उम्मेदवारी मनोनयन दर्ता गराएका हुन्। आचार्य २०७४ र २०७९ सालको प्रतिनिधिसभा निर्वाचनमा लगातार दुई पटक निर्वाचित भइसकेका उम्मेदवार हुन्।
२०७९ मा रसुवाबाट प्रतिनिधिसभा सदस्यमा दोस्रो पटक निर्वाचित हुँदा आचार्यले नेकपा एमालेका उम्मेदवार छोवाङ तेन्जिङ तामाङलाई फराकिलो मतान्तरले पराजित गरेका थिए। आचार्यले १८ हजार २३५ मत ल्याउँदा तामाङले ८ हजार ६१४ मत पाएका थिए । उनीहरूबिचको मतान्तर ९ हजार ६२१ रहेको थियो।
त्यस अधि २०७४को निर्वाचनमा पनि आचार्यले एमालेका जनार्दन ढकाललाई पराजित गरेका थिए। । आचार्यले १४ हजार ४५३मत प्राप्त गर्दा उनका निकटतम प्रतिद्वन्द्वी एमालेका जनार्दन ढकालले १० हजार २७८ मत प्राप्त गरेका थिए।
नेकपा एमालेको तर्फबाट केन्द्रीय सदस्य प्रेमबहादुर तामाङले उम्मेदवारी दर्ता गराएका छन्।तामाङ २०६४ सालमा संविधानसभा सदस्यमा निर्वाचित हुनुका साथै २०७० सालको दोस्रो संविधानसभा निर्वाचनमा पराजित र २०७४ सालमा प्रदेशसभा सदस्यमा निर्वाचित भएका थिए। तामाङ नेकपा माओबादि ,नयाँ शक्ति , नेपाली काँग्रेस हुँदै एमालेमा प्रवेश गरेका व्यक्ति हुन्।
नेपाली कम्युनिस्ट पार्टीका तर्फबाट केन्द्रीय सदस्य माधव लामिछानेले उम्मेदवारी दर्ता गराएका छन्। यसै गरी राष्ट्रिय स्वतन्त्र पार्टीको तर्फबाट वसन्त भट्ट, राष्ट्रिय प्रजातन्त्र पार्टीबाट हरिप्रसाद घिमिरे, मङ्गोल नेशनल अर्गनाइजेसनबाट विनोद थिङ, प्रगतिशील लोकतान्त्रिक पार्टीबाट दाबा साङ्बो तामाङ, कम्युनिस्ट पार्टी ९माओवादी० बाट होमप्रसाद आचार्य तथा उज्यालो नेपाल पार्टीबाट मानबहादुर तामाङले उम्मेदवारी मनोनयन दर्ता गराएका छन्।
स्वतन्त्रतर्फ सागर लामा, दावा मिङमर तामाङ र चित्रकुमारी देवकोटा पनि प्रतिनिधिसभा सदस्यका लागि प्रतिस्पर्धामा छन्।
