काठमाडौँ  – काठमाडौँ महानगरपालिका अन्तर्गतका संस्थागत शिक्षण संस्थामा शैक्षिक सत्र २०८३/०८४ का लागि कक्षा ११ र १२ मा छात्रवृत्ति कोटामा अध्ययन गर्न इच्छुक विद्यार्थीहरूका लागि परीक्षा प्रणालीमार्फत छात्रवृत्ति उपलब्ध गराइने भएको छ।

महानगरपालिकाले जारी गरेको सूचनाअनुसार अनलाइन आवेदन फाराम भर्ने प्रक्रिया २०८३ साल जेठ १ गते बिहान १० बजेदेखि सुरु हुने र जेठ १० गते राति ११:५९ बजेसम्म कायम रहनेछ। इच्छुक विद्यार्थीहरूले काठमाडौँ महानगरपालिकाको आधिकारिक वेबसाइट वा Entrance Portal Kathmandu मार्फत अनलाइन आवेदन दिन सक्ने व्यवस्था गरिएको छ।

परीक्षासम्बन्धी विस्तृत विवरण, विद्यालयगत छात्रवृत्ति कोटा तथा परीक्षा केन्द्रका जानकारी काठमाडौँ महानगरपालिकाको आधिकारिक वेबसाइट Kathmandu Metropolitan City मा उपलब्ध रहेको सूचनामा उल्लेख गरिएको छ।

काठमाडौँ महानगरपालिकाले विद्यार्थीहरूलाई समयमै आवेदन दिन र आवश्यक कागजातसहित प्रक्रिया पूरा गर्न आग्रह गरेको छ।