काठमाडौं- जनता समाजवादी पार्टी (जसपा) नेपालका अध्यक्ष उपेन्द्र यादववले प्रधानमन्त्रीको संसदमा दिएको अभिव्यक्तिप्रति आपत्ति जनाएका छन्।
आइतबार प्रतिनिधिसभामा सम्माननीय प्रधानमन्त्रीले ‘नेपालले पनि भारतको सीमा मिचेको छ’ भन्ने अभिव्यक्ति दिएको विषयलाई लिएर सामाजिक सञ्जालमार्फत प्रतिक्रिया दिँदै यादवले उक्त भनाइ गलत, त्रुटिपूर्ण र अपरिपक्व भएको बताएका हुन्।
यादवले नेपालले भारतको सीमा नमिचेको दाबी गर्दै यस विषयमा भारतले समेत कहिल्यै त्यस्तो दाबी नगरेको उल्लेख गरेका छन्। उनले प्रधानमन्त्रीको अभिव्यक्ति राष्ट्रिय हित अनुकूल नरहेको पनि बताएका छन्।
सामाजिक सञ्जालमा उनले लेखेका छन्, “आइतबार सम्माननीय प्रधानमन्त्रीले प्रतिनिधिसभामा ‘नेपालले पनि भारतको सीमा मिचेको छ’ भनी दिएको विवादास्पद अभिव्यक्ति गलत, त्रुटिपूर्ण र अपरिपक्व छ। नेपालले भारतको सीमा मिचेको छैन। भारतले पनि यस विषयमा कहिल्यै केही बोलेको छैन। प्रधानमन्त्रीको भनाइ राष्ट्रिय हित अनुकूल छैन।”
