काठमाडौं – बागमती प्रदेशका मुख्यमन्त्री इन्द्रबहादुर बानियाँले पदबाट राजीनामा दिने घोषणा गरेका छन्।
सोमबार बसेको बागमती प्रदेश सभा बैठकलाई सम्बोधन गर्दै मुख्यमन्त्री बानियाँले राजीनामाको घोषणा गरेका हुन्। नेकपा एमालेले साउन ६ गते सरकारलाई दिएको समर्थन फिर्ता लिएपछि मुख्यमन्त्री बानियाँ नेतृत्वको सरकार अल्पमतमा परेको थियो। त्यसपछि उनले विश्वासको मत लिन प्रदेश सभा बैठक आह्वान गरेका थिए।
तर, प्रदेश सभामा आवश्यक बहुमत जुट्ने अवस्था नदेखिएपछि विश्वासको मतको प्रक्रियामा जानुअघि नै बानियाँले राजीनामा घोषणा गरेका हुन्।
१०४ सदस्यीय बागमती प्रदेश सभामा सरकार गठनका लागि ५३ सांसदको समर्थन आवश्यक पर्छ। कांग्रेसका ३६ र सरकारमा सहभागी हाम्रो नेपाली पार्टीका दुई सांसद गरी बानियाँको पक्षमा ३८ सांसद मात्रै देखिएका थिए।
बानियाँ २०८२ साल साउन २० गते बागमती प्रदेशको मुख्यमन्त्री नियुक्त भएका थिए। कांग्रेसभित्रको आन्तरिक शक्ति संघर्ष र प्रतिस्पर्धाबीच मुख्यमन्त्री बनेका बानियाँ करिब एक वर्षमै पदबाट बाहिरिन लागेका हुन्।
