१३ पुस, काठमाडौं । प्रधानमन्त्रीबाट गरिएको संसद विघटनमा प्रमुख विपक्षी नेपाली कांग्रेसका सभापति शेरबहादुर देउवाले अदालतबाट जे निर्णय आउँछ त्यसलाई आफूहरुले सहर्स स्वीकार गर्ने बताउनुभएको छ।
आज नेपाल कांग्रेसले गरेको देशव्यापी आन्दोलनका क्रममा भक्तपुरमा सम्बोधन गर्दै संसद विघटनको विषय अदालतमा गइसकेको र विचाराधीन अवस्थामा भएकाले अदालतबाट आउने फैसला नै स्वीकार गर्ने उहाँले बताउनुभएको हो।
असंवैधानिक र अप्रजान्त्रिक कदम भएकाले आफूहरुले देशभर प्रदर्शन गरेको बताउनुभयो । कांग्रेसले अदालतलाई धम्क्याएर, तर्साएर यो निर्णय गर् भनेर कहिल्यै नभनेको र दवाब नदिईएको पनि उहाँले बताउनुभयो।
कम्युनिस्ट सरकारको अगाडी अदालत डराए जस्तो देखिएको भन्दै उहाँले भन्नुभयो, ‘तै पनि कति कुराहरुमा अदालतले स्वविवेकीय निर्णय गरेको छ । त्यसैले हाम्रो इच्छाविरुद्ध होस् कि इच्छाअनुसार होस्, अदालतको निर्णय मान्छौं ।’