काठमाडौं,५ बैशाख
इन्डियन्स प्रिमियर लिग (आइपिएल) क्रिकेट अन्तर्गत आइतबार भएको पहिलो खेलमा विराट कोहलीको कप्तानीमा रहेको रोयल च्यालेन्जर्स बैंगलोर (आरसिबी) ले कोलकोता नाइट राइडर्स (केकेआर) लाई ३८ रनले पराजित गरेको छ ।
पहिले ब्याटिङ गरेको आरसिबीले निर्धारित २० ओभरमा २०४ रनको विशाल स्कोर खडा गरेको थियो । आरसिबीका लागि ग्लेन म्याक्सवेलले ७८ (९ चौका, ३ छक्का), डि भिलियर्स ७६ (९ चौका, ३ छक्का) र देवदत्त पाडिकले २५ रन बनाएका थिए । कप्तान कोहली भने ५ रनमै पेभेलियन फर्केका थिए ।
जवाफमा २०५ रनको लक्ष्य लिएर मैदानमा उत्रेको केकेआर शुरुदेखि नै दबाबमा परेको थियो । कोलकाताले १३ ओभरमा ११४ रन बनाउँदा पाँच विकेट गुमाइसकेको थियो । लगभग हारतर्फ उन्मुख कोलकाताका लागि आन्द्रे रसेल र सकिब अल हसनले केही आशा जगाएका थिए ।
सकिब र आन्द्रे रसेलसामु अन्तिम ४ ओभरभित्र झण्डै ८० रन बनाउनुपर्ने कठिन चुनौती थियो । पावर हिटर रसेलले युजबेन्द्र चहलको एकै ओभरमा एक छक्का र चार चौका हिर्काएका कारण निर्णय उलटफेर गर्लान् भन्ने अनुमान गरिएको थियो ।
तर लगत्तै अर्को ओभरमा सकिब आउट भए । क्रिजमा आएका प्याट कमिन्सले एक छक्का हाने पनि उनी अर्को बलमा आउट भए । त्यसपछि रसेल पनि तिब्र दबाबमा परेका थिए । उनी १९औं ओभरमा खेल्न नसकी लगातार पाँच बल डट भएको थियो ।
जित समाप्त भएकै अवस्थामा उनी पनि २०औं ओभरमा आउट भएपछि केकेआरको जित समाप्त भएको थियो ।
यो जितसँगै आरसिबीको ३ खेलबाट ६ अंक भएको छ । अंक तालिकामा लगातार तीन खेल जितेको आरसिबी हाल पहिलो स्थानमा छ ।
