काठमाडौं । २० लाख पर्यटक ल्याउने योजनाका साथ घोषणा गरिएको भ्रमण वर्ष २०२० लाई लक्षित गरी पर्यटन व्यवसायीहरुले लगानीलाई विस्तार गरेका थिए । पर्यटन क्षेत्रमा केहि नयाँ लगानी थपिएका थिए भने केहिले लगानी थप गरेका हुन् । तर, कोरोना भाइरसको संक्रमणले विश्वभर असर गर्न थालेपछि सरकारले भ्रमण वर्ष स्थगन ग¥यो ।
कोरोना महामारीका कारण अन्तर्राष्ट्रि हवाई नै बन्द भएपछि पर्यटन व्यवसाय नै ठप्प भएको छ । यसले नेपालको पर्यटन क्षेत्रमा भएको अर्बौ लगानी जोखिममा परेको छ । लगानी जोखिममा परेपछि व्यवसायीहरुले विभिन्न मन्त्रालयमा राहतका प्याकेज माग गरेका छन् । तर, सरकारको नीति तथा कार्यक्रममा व्यवसायीको अपेक्षा अनुसार कार्यक्रम समेटिएन ।
नीति तथा कार्यक्रममा नसमेटिए पनि बजेटमा पर्यटन क्षेत्रको माग सम्बोधन गरेर खर्बौको लगानी तथा लाखौको रोजगारी जोगाउन व्यवसायीहरुले सार्वजनिक अपिल गरेका छन् । सोमबार पर्यटन क्षेत्रसँग सम्बन्धीत सघंसस्थाहरुले सामूहिक रुपमा प्रेस विज्ञप्ती जारी गर्दै बजेट मार्फत अल्पकालीन तथा दिर्घकालीन विशेष कार्यक्रमहरु ल्याउन माग गरेका हुन् ।
बिज्ञप्तीमा भनिएको छ ‘यो विषम परिस्थीतिमा राष्ट्रले नै भावी अर्थतन्त्रको आधारको रुपमा महत्व दिदै आएको नेपालको पर्यटन क्षेत्रलाई जीवन र मरणको दोसाधबाट उद्धार गर्न सरकार जिम्मेवारपूर्ण तवरले पर्यटन मैत्री अभिभावकको भुमिकामा खरो रुपमा उत्रनु पर्छ भन्ने हाम्रो आवाजलाई गम्भीरताका साथ लिने छ भन्ने विश्वासका साथ पुनः सम्बन्धित क्षेत्रको ध्यानाकर्षण गराउदछौं ।’ 
