काठमाडौँ । नेकपाका उपाध्यक्ष वामदेब गौतमले लिम्पियाधुरा समेत समेटेर नयाँ नक्सा जारी गर्ने निर्णय पार्टीले गरेको बताएका छन् । उनले भनेका छन्, यो नेपालका सबै भूभाग समेटेर नयाँ नक्सा बनाउने र सार्वजनिक गर्ने भनी पार्टीले निर्णय गरेको हो र त्यो काम सरकारले गरेको हो । सरकारले लिम्पियाधुरासहितको नक्सा पार्टी निर्णय अनुसार पारित गरेको दाबी उनले गरेका छन्।
बुधबार एक प्रेस नोटमार्फत उनले पार्टी निर्णयअनुसार नै भएको कामलाई लिएर कुनै एक व्यक्तिको देवत्वकरण नगर्न समेत उनले आग्रह गरेका छन्। उनको यो भनाईको लक्ष प्रधानमन्त्री ओलीप्रति देखिन्छ । अनुयायीहरु व्यक्ति केन्द्रित हुन्छन् र निश्चित व्यक्तिका नामलाई देवत्वकरण गर्न व्यस्त हुने प्रचलन छु, गौतमले भनेका छन् तर, यो निर्णय पार्टीको सामूहिक निर्णयप्रक्रिया अनुसार भएर, नेपाल सरकारबाट पनि त्यहीअनुरुप अनुमोदन भएको वास्तविकतालाई सबैले स्वीकार गर्नुपर्छ।
सोमबार सरकारले लिम्पियाधुरासम्म भुभाग समेटेर नेपालको नक्सा पारित गरेको थियो। नक्सा पारित भएकोमा प्रधानमन्त्री एवम् पार्टी अध्यक्ष केपी ओली निकटका नेता कार्यकर्ताहरुले प्रधानमन्त्री ओली र भूमि व्यवस्था मन्त्री पद्मा अर्यालको उच्च प्रशंसा गरेका थिए।
प्रधानमन्त्री ओलीको देवत्वकरणका कारण उपाध्यक्ष गौतमले यो प्रेस नोट जारी गरेको देखिन्छ । उनले ऐतिहासिक तथ्य, प्रमाण र लिखतद्वारा निर्दिष्ट गरिएको आधारमा नेपाल सरकारले देशको नयाँ नक्सा सार्वजनिक गरेको समेत बताएका छन्। तर पनि सो नोटमा उनले समस्त नेपाली जनसमुदाय प्रधानमन्त्री केपी शर्मा ओली नेतृत्वको सरकारप्रति आभारी रहेको पनि भनेका छन् ।
प्रेस नोटमा उनले नक्सा सार्वजनिक गर्ने विषयलाई सशक्त रुपमा उठाउने आफू भएको समेत दाबी गरेका छन् । नेपालका अतिक्रमित भूमिलाई समेटेर देशको नक्सा जारी गर्नुपर्ने सन्दर्भमा मैले सुरूदेखि नै पार्टीमा सशक्त विचार र जोडदार माग राख्दै आएको सबैमा स्मरण गराउन चाहन्छुु, गौतमले भनेका छन् ।
