- रगत -पदम विश्वकर्मा,अमेरिका
यति बेला म त्रसित छु
विगतजस्तै
मेरो रगत चल्छ चल्दैन ।
मलाई थाहा थियो,
–रगत सबैको रातै हुन्छ
–रगत सबैको तातै हुन्छ
–रगत सबैको उस्तै हुन्छ ।
त्यो पनि थाहा थियो,
–मुटु सबैको उस्तै हुन्छ
–श्वास सबैको उस्तै हुन्छ
–रक्तकोशिका सबैको उस्तै हुन्छ
–माटो सबैको उस्तै हुन्छ
तर सदियौं पछि पनि
उ उस्तै हुन सकेन ।
हामी दुईमा केबल,
–जन्म फरक थिए
–खानापिन फरक थिए
–शिक्षा फरक थिए
–न्याय निसाफ फरक थिए र
–सुविधा फरक थिए
गरीबीले – उसको रंग धमिलोे बनायो
अशिक्षाले –उसको आवाज नमीठो बनायो
अभावले – उसको ओत झुपडी बनायो
अचेतनाले – उसको स्वभाव नरम बनायो
सदियौंदेखि यहाँ,
उसले बनाएका –औजार चलिरह्योे
उसले सिएका – लुगा चलिरह्यो
उसले बनाएका –गहना चलिरह्यो
मनोरन्जनका निम्ति – दिदीबहिनीहरु चलिरहे
उसको सीप चल्यो, पसिना चलिरह्यो
तर उ कहिल्यै चल्न सकेन ।
त्यसैले,
यतिबेला म डराएको छु
म त्रसित छु र सोचिरहेछु
बराजुको युगजस्तै
सोचिरहेछु
उसको रगत चल्छ चल्दैन ।
