१४ माघ, चितवन । भरतपुर महानगरपालिका २० मा निर्माणधिन गौतम बुद्ध रंगशाला निर्माणका लागि महानगरपालिकाले धुर्मुस सुन्तली फाउण्डेसनलाई थप ४ करोड रुपैँया सहयोग गरेको छ।
रंगाशाला निर्माणका लागि बुधबार महानगर कार्यालयमा मेयर रेनु दाहालले फाउण्डेसनका अध्यक्ष सिताराम कट्टेल ‘धुर्मुस’लाई चार करोड रुपैयाँको चेक हस्तान्तरण गर्नुभएको हो ।
महानगर प्रमुख दाहालले महानगरको आन्तरिक स्रोतबाट रंगशाला निर्माण कार्यका लागि धुर्मुस सुन्तली फाउण्डेसनलाई पटकपटक गरी पहिले चार करोड र अहिले थप चार करोड रुपैयाँ दिइएको बताउनुभएको छ।
चेक हस्तान्तरणको अवसरमा भरतपुर महानगर प्रमुख रेनु दाहालसँगै उपप्रमुख पार्वती शाह, प्रमुख प्रशासकीय अधिकृत प्रेमराज जोशीलगायतको उपस्थिति रहेको थियो । महानगरका प्रमुख प्रशासकीय अधिकृत जोशीले भरतपुर महानगरपालिकाको गौरवको आयोजनाको रुपमा लिइएको रंगशाला निजी क्षेत्रको समेत सहयोगमा निर्माण सम्पन्न गरिने बताउनुभयो।
