३१ चैत्र, काठमाडौं । स्वास्थ्य तथा जनसंख्या मन्त्री हृदयेश त्रिपाठीले कोरोनाभाइरसको दोस्रो लहरले डरलाग्दो अवस्था निम्त्याउँदै गरेको भन्दै चुनौती थपिँदै गएको बताउनुभएको छ ।
मंगलबार स्वास्थ्य मन्त्रालयमा आयोजित पत्रकार सम्मेलनमा मन्त्री त्रिपाठीले संक्रमण डरलाग्दो अवस्थामा पुगिसकेको र यसबाट बालबालिकाहरुलाई जोगौना मुस्किल पर्ने बताउनुभएको हो । उहाँले भन्नुभयो, ‘संक्रमण डरलाग्दो संक्रमण यस मानेमा छ कि अहिलेसम्म जतिपनि भ्याक्सिन बनेका छन् १८ वर्षमाथिका लागि मात्रै बनेको छ, बालबालिकालाई जोगाउन चुनौती थपिएको छ ।’
यहि अवस्थालाई मध्यनजर गर्दै काठमाडौंसहितका सहरी क्षेत्रका विद्यालयहरु बन्द गर्दै अनलाइन माध्यममा जाने भनेर छलफल सुझाव आएको र सोहि अनुरुप छलफल भइरहेको पनि उहाँले बताउनुभयो। तर तत्कालका लागि केही निर्णय नभएको अवस्थामा बालबालिकाहरुलाई संक्रमणबाट जोगाउँदै जनजीवनलाई पनि सामान्य बनाउन सबै पक्षले स्वास्थ्य मापदण्ड पालना गर्नुपर्नेमा उहाँले जोड दिनुभयो ।
