पोखरा ,१६ बैशाख
गण्डकी प्रदेशका मुख्यमन्त्री पृथ्वीसुब्बा गुरुङविरुद्धको अविश्वास प्रस्तावमा मतदानका बेला अनुपस्थित रहनुभएका सांसद खिमविक्रम शाहीले आफू सदनमा जानै लाग्दा बिरामी परी अचानक बेहोस भई अस्पताल भर्ना भएको बताउनुभएको छ ।
राष्ट्रिय जनमोर्चाको तर्फबाट सांसद बन्नुभएका शाहीले विज्ञप्ती जारी गर्दै आफ्नो स्वास्थ्यमा क्रमिक सुधार आएको र आफू थप स्वस्थ भएपछि आफूमाथि उठेका सम्पूर्ण प्रश्नको स्पष्ट गर्ने बताउनुभएको हो ।
उहाँले विज्ञप्तीमा भन्नुभएको छ,
म खिम विक्रम शाही राष्ट्रिय जनमचाको तर्फबाट गण्डकी प्रदेश, बागलुङ जिल्ला प्रतिनिधिसभा निर्वाचन क्षेत्र नं. २, प्रदेश सभा निर्वाचन क्षेत्र नं. ख बाट निर्वाचीत प्रदेश सभाको सदस्य हो । मिति २०७८ वैशाख १५ गते सदनको कार्यसुची बमोजीम मूख्यमन्त्री माथिको अविश्वासको प्रस्तावमाथि छलफल र मतदान हुने रहेको थियो । तर म सदनमा जाने भनि तयारी अवस्थामा रहेको बेला अचानक विरामी भई मेरो आफ्नै भाईलाई सम्पर्क गरेर आफ्नो स्वास्थ्य उपचारका लागि अस्पताल लैजाने क्रममा म बेहोस भएछु । म अहिले उपचाररत छु । हाल मेरो स्वास्थ्यमा क्रमिक सुधार आएको महशुस गरेको छ । म थप स्वस्थ भए पछि मेरो बारेमा उठेका कैयौं प्रश्नको बारेमा स्पष्ट गर्ने नै छु ।
अहिले समाचार र सामाजिक सञ्जालमा प्रचार भएका विभिन्न भ्रामीक खबरबाट आफ्नो धारणा बनाएर विचार प्रकट नगरि दिनु हुन म सम्पूर्ण दाजुभाई दिदी बहिनी र मेरा शुभचिन्तकहरुमा प्रष्ट पार्न चाहान्छु । साथै पार्टीको निर्णय र संसदीय दलको बैठकमा गरिएको निर्णयमा मेरो पनि सहभागिता रहेका कारण ती निर्णयहरुप्रति मेरो पनि सहमति रहेकाले त्यस विषयमा पांटी निर्णय प्रति प्रतिबद्धता कायमै छ ।
मेरो स्वास्थ्यप्रति गम्भीर भई उपचारमा सहयोग गर्नुहुने स्वास्थ्यकर्मी, स्वास्थ्यप्रति चासो र चिन्ता प्रकट गर्नु हुने मेरा पार्टीका नेता, प्रदेश सभाका माननीय ज्यूहरु, अग्रज साथीहरु र सम्पूर्ण शुभचिन्तकमा – धन्यबाद प्रकट गर्दछु ।