१३ असोज, काठमाडौं । सभामुख अग्नी सापकोटाविरुद्ध मुद्दाको सुनुवाइ आज पनि नहुने भएको छ ।
बुधबारको संवैधानिक इजलासमा मुद्दाको पेशी तोकिएको भएपनि अदालत प्रशासनले मुद्दाको सुनुवाइ नमिल्नेमा राखेको जनाएको छ । इजलासमा सो मुद्दाको पेशी पटकपटक चढाइएपनि सुनुवाइ हुन सकेको छैन ।
यसअघि भदौ १६ गते मुद्दाको पेशी संवैधानिक इजलासमा चढेको थियो । त्यतिबेला पनि सो मुद्दाको सुनुवाइ हेर्न नमिल्नेमा राखिएको थियो ।
सभामुख सापकोटाविरुद्ध माओवादी युद्धका बेला अपहरणपछि मारिएका काभ्रेका अर्जुन लामाको हत्यामा दोषी रहेको भन्दै १० वर्षअघि मुद्दा परेको थियो । द्वन्द्वकालमा लामाको अपहरणपछि हत्या भएको थियो ।
तत्कालीन एमालेका स्थानीय नेता अर्जुन लामाको हत्या प्रकरणमा लामाकी पत्नी पूर्णिमाया लामाले काभ्रे जिल्ला प्रशासनमा जाहेरी दिएकी थिइन् । २०६२ वैशाखमा माओवादीले अपहरण गरेको र सोही वर्षको असार दोस्रो साता हत्या लामाको हत्या गरिएको भन्दै पूर्णिमायाले सापकोटाविरुद्ध उजुरी दिएकी थिइन् ।