काठमाडौँ । नेपालकी मेनुका पौडेल आफ्नो गायन प्रस्तुतिमार्फत इण्डियन आइडलमा चर्चित छन् । उनी इण्डियन आइडलको अन्तिम ११ मा प्रवेश गरेकी छन् । आइतबार रातिको एपिसोडबाट एकजना प्रतिस्पर्धी बाहिरिँदा मेनुका भने अन्तिम ११ मा प्रवेश गरेकी हुन् ।
‘बटम चार’मा रहेकी उनी बाँकी तीन जनाभन्दा बढी भोट ल्याएर सुरुमै सुरक्षित भइन् । यद्यपि, ‘बटम चार’मा पर्नुले भोटको कमी छ भन्ने जनाउँछ ।
उक्त एपिसोडमा मेनुकाले लगातार तीन गीत गाइन् । एक गीत गाउँदा उनले लिरिक्सै नै बिर्सिन पुगिन् । गाउँदै गर्दा उनको हार्ट बिट बढेपछि म्युजिक बन्द गरियो । उनलाई पानी पिउन दिइयो ।
मेनुकालाई सान्त्वना दिन बलिउड अभिनेता सञ्जय दत्तसँगै जजहरु स्टेजमा पुगेका थिए । स्टेजको छेउमा लगेर चिकित्सकले मेनुकाको रक्तचाप जाँचे । डाक्टरद्वारा प्रस्तुतिलाई निरन्तर राख्न सुझावपछि कार्यक्रम अगाडि बढाइयो । त्यसपछि मेनुकाले गीत पुरा गरिन् ।
