बुटवल- लुम्बिनी प्रदेशका मुख्यमन्त्री डिल्लीबहादुर चौधरीले विश्व शान्तिभूमि लुम्बिनीलाई संसारभर परिचित गराउन ९ जना नोबल पुरस्कार विजेता सहित ३ सयभन्दा धेरै विज्ञ सम्मिलित विशेष सम्मेलन गर्न लागिएको बताउनुभएको छ।
‘बालबालिका, विकास र शान्तिको लौरियट्स एण्ड लिड्र्स चौथो शिखर सम्मेलन’ले लुम्बिनीको विकास र बुद्धभूमिबारे थप प्रचारप्रसार हुने बताउनुभयो।
लुम्विनी प्रदेश सरकारको आयोजनामा फागुन २८ र २९ गते बुद्धभूमिमा लुम्बिनीमा हुने सम्मेलनबारे जानकारी दिन आज बुटवलमा आयोजित पत्रकार सम्मेलनमा मुख्यमन्त्री चौधरीले सम्मेलनले लुम्बिनीलाई अन्तर्राष्ट्रिय रूपमा बुद्धका करुणा, अहिंसा र शान्तिका सन्देश प्रचार प्रसारमा ठूलो टेवा पुर्याउने बताउनुभएको हो ।
सम्मेलनमा विभिन्न देशका ९ जना नोबेल शान्ति पुरस्कार विजेताहरू लुम्बिनी आउने निश्चित भइसकेको छ । सम्मेलनमा विभिन्न देशका २०० भन्दा बढी विकास साझेदार सहित ३ सयभन्दा धेरै सहभागी हुने छन् ।
नोबेल पुरस्कार विजेताहरूलाई पाल्पा, अर्घाखाँचीको सुपादेउराली, प्यूठानको स्वगद्धारी र बर्दिया राष्ट्रिय निकुञ्जसमेत लैजाने तयारी छ ।
सम्मेलनको उद्घाटन प्रधानमन्त्री पुष्पकमल दाहाल प्रचण्डले गर्ने पनि मुख्यमन्त्री चौधरीले जानकारी दिनुभयो । १० वटा कार्यपत्र समेत प्रस्तुत हुने सम्मेलन मायादेवी मन्दिर परिसरबाट घोषणापत्र जारी गर्दै सकिने छ ।
सम्मेलनले बालबालिकामाथि हुने हिंसा, बालश्रम, बालविवाह र बालबालिका बेचबिखनलाई नियन्त्रण एवं न्यूनीकरण गर्दै लुम्बिनीमा लगानी प्रवर्द्धनको वातावरण बनाउने विश्वास मुख्यमन्त्री चौधरीले जानकारी दिनुभयो ।
