काठमाडौं । राष्ट्रपति रामचन्द्र पौडेलले प्रदेशहरुलाई अधिकार सम्पन्न बनाउने कानून छिटो निर्माण गर्न आग्रह गर्नुभएको छ ।
शहीद केशव कोईराला स्मृति प्रतिष्ठान र महिटानी नगरपालिकाको संयुक्त आयोजनामा आयोजित शहिद केशव कोईरालाको शालिक अनावरण कार्यक्रमलाई सम्बोधन गर्दै उहाँले यस्तो बताउनुभएको हो । उहाँले संघ केन्द्रित अधिकार तल्लो तहमा कार्यान्वनय गर्न बाँकी रहेकोले अब विलम्व गर्नु नहुने बताउनु भयो । उहाँले व्यवस्था परिवर्तन भएपनि अझै जनताको अवस्था परिवर्तन गर्न बाँकी रहेको बताउनु भयो । उहाँले प्रशासनिक रुपमा राज्यको पुनःसंरचना गरेको भएपनि राज्यको चरित्रको भने पुनः संरचना हुन अझै बाँकी रहेको जिकिर गर्नुभयो ।
उहाँले भन्नुभयो, ‘हाम्रो संविधानले निर्दिष्ट गरेको लोकतान्त्रिक गणतन्त्रले नागरिकको राजनीतकि, आर्थिक, सामाजिक, धार्मिक, प्रशासनिक स्वतन्त्रतासँगै निमुखा जनतालाई न्याय र विपन्न जनतालाई आयको लक्ष्य राखेको छ । अधिकारका विभिन्न प्रकार उल्लेख गरेपनि ति सबै अधिकारले निमुखा जनतालाई निर्वाध स्वतन्त्रता प्रयोग गर्ने र उनीहरुको जीवनस्तर उकास्ने अवसर प्रदान गर्ने विषयहरु संघीय लोकतान्त्रिक गणतन्त्रले बोकेको छ । तर यहाँ व्यवस्था त परिवर्तन भएको छ । हाम्रो देश र समाज र जनताको सामान्य अवस्थामा अझै पनि परिवर्तन हुन बाँकी छ । हामीले प्रशासनिक रुपमा राज्यको पुनःसंरचना ग¥यौं, तल्लो भन्दा तल्लो तहमा रहेका जनताको पहुँचमा राज्य सत्ता पुगेको छ । तर राज्यको चरित्रको भने पुनः संरचना हुन अझै बाँकी छ । अझै पनि हामीले केन्द्रित गरेर राखेको अधिकार तल्लो तहमा कार्यान्वनय गर्न बाँकी छ । अब यसका लागि हामीले विलम्व गर्नु हुँदैन भन्ने मलाई लाग्दछ । प्रदेशहरुलाई अधिकार सम्पन्न बनाउने कानून छिटो निर्माण गर्न संघीय संसदमा प्रतिनिधित्व गर्ने राजनीतिक दलका नेताहरुलाई आग्रह गरेको छु ।’
राष्ट्रपति पौडेलले लोकतन्त्रलाई राज्य सञ्चालनको माध्यम मात्र नबनाइ जीवनदर्शन र संस्कार बनाएर अघि बढाउन आवश्यक रहेको बताउनु भयो । —न्युज एजेन्सी नेपाल
