काठमाडौं । प्रधानमन्त्री केपी शर्मा ओलीको स्वास्थ्यमा समस्या देखिएको छ ।
अचानक स्वास्थ्यमा समस्या आएपछि प्रधानमन्त्री ओलीले आजका सबै कार्यक्रम रद्द गर्नुभएको छ । प्रधानमन्त्री ओली हिजो पनि सार्वजनिक कार्यक्रममा देखिनु भएन ।
प्रधानमन्त्री ओली सहभागी हुने हिजो तीन वटा महत्वपूर्ण कार्यक्रम थिए । तर चिकित्सकसँग परामर्श गरेपछि उहाँ ती कार्यक्रममा सहभागी हुनुभएन ।
प्रधानमन्त्री ओलीले शुक्रबार लुम्बिनी प्रदेशका मुख्यमन्त्री चतनारायण आचार्यसहित सवै मन्त्रीसँग भेट्ने कार्यक्रम रहेपनि स्वास्थ्यमा समस्या आएपछि आइतबार सारिएको छ ।
अस्वस्थताकै कारण प्रधानमन्त्री ओली नेकपा एमाले वन तथा वातावरण विभागले सामुदायिक वन दिवसको अवसरमा आयोजना गरेको वनको दिगो व्यवस्थापन, समृद्धि र जनवायु न्याय विषयक राष्ट्रिय नीति सम्वाद कार्यक्रममा समेत सहभागी हुनुभएन । प्रधानमन्त्री ओलीको सचिवालयले भने यस विषयमा कुनै औपचारिक जानकारी दिएको छैन ।
