काठमाडौं – विनाशकारी बाढीबाट प्रभावित नेपाललाई सहयोग गर्न भारतले बुधवार थप ३५ टन राहत तथा उद्धार सामग्री पठाएको छ ।
भारतीय वायुसेनाको सी–१७ ट्रान्स पोर्ट विमानमार्फत ल्याइएको आठौँ खेपको सामग्री नेपाल सरकारलाई हस्तान्तरण गरिएको हो ।
भारतका अनुसार पछिल्लो राहत खेपमा राष्ट्रिय विपद् प्रतिकार्य बल (एनडीआरएफ) का उद्धार उपकरण, फरेन्सिक सामग्री, उद्धार सामग्री तथा सुरक्षाकर्मीका लागि आवश्यक बन्दोबस्तीका सामान समावेश छन् । सामग्री मन्त्री महावीर पुनलाई हस्तान्तरण गरिएको जनाइएको छ ।
भारतीय विदेश मन्त्रालयका प्रवक्ता रणधीर जैसवालका अनुसार नेपालमा बाढीपछि भारतले राहत तथा उद्धार प्रयासलाई निरन्तरता दिँदै आएको छ ।
बाढी गएको दिन भारतीय प्रधानमन्त्री नरेन्द्र मोदी र नेपालका प्रधानमन्त्री बालेन्द्र शाहबिच टेलिफोन वार्ता भएको केही घण्टामै भारतले पहिलो चरणको मानवीय सहायता नेपाल पठाएको थियो ।
त्यसयता भारतले विभिन्न चरणमा नेपाललाई राहत सामग्री, अत्यावश्यक औषधि तथा उद्धार उपकरण उपलब्ध गराउँदै आएको छ । त्यस्तै, नेपाली सेनासँग सहकार्य गरी उद्धार कार्यमा सघाउन भारतीय सुरुङ उद्धार टोली तथा मृतकको पहिचानमा सहयोग गर्न फरेन्सिक टोलीसमेत नेपालमा खटाइएको छ ।
यसअघि सेप्टेम्बर ३ को राति भारतले दुईवटा सैन्य विमानमार्फत २१ टनभन्दा बढी अत्यावश्यक राहत सामग्रीसहित छैटौँ र सातौँ खेप नेपाल पठाएको थियो । पछिल्लो ३५ टन सामग्रीसँगै भारतबाट नेपालमा पुगेको राहत सहयोग थप विस्तार भएको छ ।
