काठमाडाैँ । पोखरा अन्तर्राष्ट्रिय विमानस्थल सञ्चालनमा आएको झन्डै तीन वर्षपछि नियमित अन्तर्राष्ट्रिय व्यावसायिक उडानको सम्भावना बलियो बनेको छ । फ्लाई दुबईको जहाज पोखरामा अवतरण गरेसँगै लामो समयदेखि व्यावसायिक अन्तर्राष्ट्रिय उडानको प्रतीक्षामा रहेका पोखराका पर्यटन व्यवसायी तथा स्थानीयमा उत्साह बढेको हो ।
पोखरा अन्तर्राष्ट्रिय विमानस्थल उद्घाटन भएयता नियमित व्यावसायिक अन्तर्राष्ट्रिय उडान हुन सकेको थिएन । यसअघि हिमालय एयरलाइन्सले पोखरा–ल्हासा उडानको प्रयास गरे पनि यात्रु अभावका कारण सेवा निरन्तर हुन सकेन । त्यसपछि विमानस्थलको पूर्ण क्षमतामा सञ्चालनबारे प्रश्न उठ्दै आएको थियो ।
फ्लाई दुबईको जहाज पोखरा अवतरण गरेपछि भने पर्यटन व्यवसायीहरूले विमानस्थलबाट नियमित अन्तर्राष्ट्रिय उडानको सम्भावना बढेको बताएका छन् । पोखरा पर्यटन परिषद्का अध्यक्ष हरि भुजेलले नियमित अन्तर्राष्ट्रिय उडानले पोखरालाई विश्वका प्रमुख पर्यटकीय गन्तव्यसँग प्रत्यक्ष जोड्नुका साथै स्थानीय अर्थतन्त्रमा समेत महत्वपूर्ण योगदान पुर्याउने बताउनुभयो ।
उहाँले फ्लाई दुबईको आगमनलाई पोखराको पर्यटन विकासका लागि महत्वपूर्ण उपलब्धिका रूपमा लिनुपर्ने बताउँदै उडानलाई नियमित र दिगो बनाउन सबै पक्षको सहकार्य आवश्यक रहेको उल्लेख गर्नुभयो । फ्लाई दुबईमार्फत पोखरा अन्तर्राष्ट्रिय हवाई सञ्जालमा जोडिने आधार बनेको उहाँको भनाइ छ ।
भुजेलले अन्तर्राष्ट्रिय उडान सुरु हुनु जत्तिकै त्यसको निरन्तरता र दिगो व्यवस्थापन चुनौतीपूर्ण रहेको बताउनुभयो । स्थानीय, प्रदेश र संघीय सरकार, राजनीतिक दल, निजी क्षेत्र तथा अन्य सरोकारवाला निकायबीच साझा सहकार्य भए मात्र अन्तर्राष्ट्रिय उडानलाई दीर्घकालीन रूपमा सञ्चालन गर्न सकिने उहाँले बताउनुभयो ।
नेपाल पर्यटन बोर्डका सदस्य सन्तोष पोखरेलले पोखराबाट अन्तर्राष्ट्रिय उडानको सम्भावनालाई मूर्त रूप दिन विदेशमा लक्षित प्रवद्र्धनात्मक अभियान सञ्चालन गर्नुपर्ने बताउनुभयो । उहाँले ‘जाऊँ है पोखरा’ अभियानलाई अन्तर्राष्ट्रियकरण गर्दै पर्यटन व्यवसायी, नागरिक समाज र सञ्चारकर्मीले समेत सहकार्य गर्नुपर्नेमा जोड दिनुभयो ।
पोखरेलले पोखरा अन्तर्राष्ट्रिय विमानस्थललाई पूर्ण क्षमता र दिगो रूपमा सञ्चालन गर्न विश्वभर रहेका नेपाली तथा सरोकारवालाले केही समय निरन्तर अभियान चलाउनुपर्ने बताउनुभयो । अन्तर्राष्ट्रिय उडानले विदेशी पर्यटकको आगमन बढाउनुका साथै उनीहरूको पोखरा बसाइ अवधि लम्ब्याउन सहयोग पुग्ने उहाँको भनाइ छ ।
पर्यटन व्यवसायी गोपी भट्टराईले नियमित अन्तर्राष्ट्रिय उडान सुरु भए होटल, यातायातलगायत समग्र पर्यटन व्यवसायमा नयाँ उत्साह आउने बताउनुभयो । उहाँका अनुसार दुबई प्रमुख अन्तर्राष्ट्रिय हवाई ट्रान्जिट केन्द्र भएकाले पोखराबाट हुने उडानले विश्वका विभिन्न गन्तव्यसँग जोडिने अवसर सिर्जना गरेको छ ।
फ्लाई दुबईको जहाज पूर्ण यात्रु भारसहित पोखरामा अवतरण र उडान गरेको उल्लेख गर्दै भट्टराईले यसबाट विमानस्थल अन्तर्राष्ट्रिय व्यावसायिक उडानका लागि सक्षम रहेको पुष्टि भएको दाबी गर्नुभयो ।
दशैँ, तिहार र नयाँ वर्षजस्ता प्रमुख चाडपर्वको पूर्वसन्ध्यामा उडान सुरु भएकाले यात्रुको चाप व्यवस्थापनमा समेत यसले सहयोग पुग्ने व्यवसायीहरूको अपेक्षा छ । काठमाडौंको तुलनामा पोखराबाट करिब पाँच हजार रुपैयाँ सस्तोमा उडान सुविधा उपलब्ध हुने भएकाले यात्रु आकर्षित हुने उनीहरूको विश्वास छ ।
भट्टराईका अनुसार फ्लाई दुबईको उडानका लागि विगत एक वर्षदेखि निरन्तर गृहकार्य हुँदै आएको थियो । अब श्रम स्वीकृतिलगायतका आवश्यक प्राविधिक प्रक्रिया पोखराबाटै सहज रूपमा उपलब्ध गराउनुपर्ने आवश्यकता रहेको उहाँले बताउनुभयो ।
पोखरामा अन्तर्राष्ट्रिय उडानको वातावरण बनेसँगै एयर अरेबिया, इमिरेट्स र इन्डिगोलगायतका अन्य अन्तर्राष्ट्रिय वायुसेवा कम्पनीले पनि उडानको तयारी थालेको पर्यटन व्यवसायीहरूको दाबी छ ।
सरोकारवालाहरूले भने अहिलेको मुख्य चुनौती पोखरा अन्तर्राष्ट्रिय विमानस्थलमा भएका उडानलाई चार्टर्डमा मात्र सीमित नराखी नियमित व्यावसायिक तालिकामा लैजानु रहेको बताएका छन् । नियमित र दिगो अन्तर्राष्ट्रिय उडान सञ्चालन हुन सके पोखराको पर्यटनसँगै गण्डकी प्रदेश र समग्र मुलुकको अर्थतन्त्रमा समेत सकारात्मक प्रभाव पर्ने उनीहरूको अपेक्षा छ ।
