काठमाडौ, १२ असोज । समानुपातिक सूचीमा आफ्नो पक्षलाई बेवास्ता गरेको भन्दै नेपाली कांग्रेसको संस्थापनइतर समूह धर्नामा उत्रिएको छ। यसअघि घोषित आन्दोलनका कार्यक्रमअन्तर्गत इतर समूहले सानेपास्थित पार्टी कार्यालयमा मौन धर्ना दिएको हो।

सभापति शेरबहादुर देउवाले पार्टीमा एकलौटी निर्णय गरेको आरोप लगाउँदै शेखर कोइराला–गगन थापा पक्षका नेताहरूले टिकट वितरणमा समान अवसर पाउनुपर्ने माग राख्दै आएका छन्।

सोमबार ठमेलस्थित होटेल यात्रीमा बसेको इतर समूहको भेलाले समानुपातिकको सूची सच्याउन दबाब दिने उद्देश्यले १२ र १३ असोजका लागि आन्दोलनका कार्यक्रम घोषणा गरेको थियो। समानुपातिकतर्फको बन्दसूची सच्याउन र टिकट वितरणमा ४० प्रतिशत भाग खोज्दै इतर समूहका नेताहरू सानेपामा मौन धर्नामा बसेका हुन्।